ვანო მაჭავარიანი რამდენიმე დღის წინ მის მიერ გაკეთებულ კომენტარზე განმარტებას აკეთებს. იგი აცხადებს, რომ "კვირის პალიტრის" ჟურნალისტთან მას არ უთქვამს, რომ მარგველაშვილისა და პუტინის შეხვედრა იგეგმებოდა და მთავრობამ ის ჩაშალა.

მაჭავარიანის თქმით, პრეზიდენტის ადმინისტრაცია ვალდებული იყო მოემზადებინა თემატური და შინაარსობრივი მხარე მსგავსი შეხვედრის დაგეგმვის შემთხვევაში. პრეზიდენტის ყოფილი მრჩეველი აცხადებს, რომ მას ამ თემაზე საუბარი როგორც რუსეთთან ურთიერთობის საკითხებში პრემიერის წარმომადგენელთან, ზურაბ აბაშიძესთან, ისე საგარეო საქმეთა მინისტრის მოადგილე, დავით ზალკალიანთან, ასევე სქართველოს პარტნიორი ქვეყნების წარმომდგენლებთანაც ჰქონდა.

მაჭავარიანის განმარტებით, იქიდან გამომდინარე, რომ ხელისუფლებამ არ მოინდომა აღნიშნული შეხვედრის ჩატარება მისი შინაარსობრივი მხარის მომზადებაზე განხილვები შეჩერდა და გადაიდო.

„მარგველაშვილი-პუტინის შეხვედრა არ იგეგმებოდა, მე ამაზე არ მისაუბრია, ვალდებული ვიყავი, რომ მოგვემზადებინა თემატურად, შინაარსობრივად ეს საკითხები. მომზადება გულისხმობს იმას, რომ ჩვენ ვამბობდით- ვამზადებთ შინაარსობრივად ამ თემას. შემდგომში ამ შეხვედრის მიზანშეწონილობასთან დაკავშირებით გაიმართა შეხვედრები მთავრობის წარმომადგენლებთან, საუბარი მქონდა ზურაბ აბაშიძესთან და დავით ზალკალიანთან, ასევე სხვებთანაც, მათ შორის ჩვენი პარტნიორი ქვეყნების წარმომადგენლებთან. მთავრობამ არ მოინდომა ეს შეხვედრა და შესაბამისად ეს თემა გადაიდო“- განაცხადა მაჭავარიანმა.