ერთმანეთის მიმართ გაკეთებული დაძაბული კომენტარების შემდეგ თედო ჯაფარიძე და ზურაბ აბაშიძე დღეს პირველად შეხვდნენ. დიპლომატების შეხვედრა საქართველოს პარლამენტის თბილისის შენობაში მოხდა. პრემიერ მინისტრის სპეციალურმა წარმომადგენელმა და პარლამენტის საგარეო ურთიერთობების კომიტეტის ხელმძღვანელმა მათი კონფლიქტი, რომელიც პრაღის შეხვედრების მიზანშეწონილობას უკავშირდებოდა ამოწურულად ჩათვალეს. დღეს ზურაბ აბაშიძემ პარლამენტის რამდენიმე კომიტეტის გაერთიანებულ სხდომაზე პარლამენტარებს პრაღის ფორმატთან დაკავშირებით ანგარიში წარუდგინა, ასევე განაცხადა, რომ გრიგორი კარასინთან ერთი-ერთზე შეხვედრაზე ქვეყნის პირველი პირების შეხვედრა მხოლოდ იდეის დონეზე განიხილეს.

„დიალოგს არ აქვს ალტერნატივა, ჯობია საუბარი, ვიდრე ბრძოლის გამართვა, ამაზე ჩვენ არ ვკამათობთ, მაგრამ არის მომენტები, როდესაც ამ მოლაპარაკებების დროს ხანდახან ტემპერატურას უნდა აუწიო, ეს მოლაპარაკების ერთერთი ინტრუმენტია, თქვენი და კარასინის საუბრების რეალობა და ის რეალობა , რომელიც კარასინის მონაწილეობით იმართება ჟენევაში, რამდენად ახდენს გავლენას ერთმანეთზე?“- მიმართა ზურაბ აბაშიძეს შეკითხვით თედო ჯაფარიძემ.

„ძალიან რთული კითხვაა, ბატონი თედო ყველაზე რთულ შეკითხვებს მისვამს, ბატონ თედოს ვაწყენინე მე წასვლის წინ, მერე პატიება ვთხოვე... მე მგონია მაპატია, მე და ბატონი თედო ვართ იმდენი წლის მეგობრები, რომ რუსები ამაზე ამბობენ „сколько ни живут“... როდესაც გაჩნდა ახალი ფაქტორი ამ შეთანმხმების სახით ამას ძალიან კარგი გააზრება სჭირდება, რომ არ დავაზიანოთ მთავარი საქმე, სერიოზული მონიტორინგი სჭირდება იმას რაც ხდება აფხაზეთში, ჩვენი ზედმეტი აქტიურობით და ზოგიერთის ისტერიით, პირიქით ხელი არ შევუქყოთ პროცესის დაჩქარებას, რომ ისეთი ხელშეკრულება მიიღონ რომელიც აფხაზებსაც არ უნდათ“- განაცხადა აბაშიძემ.