ჯერ არგახსნილი ტელეკომპანია „ტი-ვი-ესი“ მუშაობას აჩერებს. ტელევიზიის ხელმძღვანელობამ თანამშრომლები ექვსთვიან უხელფასო შვებულებაში გაუშვა. არხის თანამშრომლებს მიზეზის დასახელება უჭირთ, მათი ცნობით, ერთ-ერთი მიზეზი ტექნიკური ბაზაა, თუმცა მათთვის რეალური ინფორმაცია არავის მიუწოდებია.

არხის მუშაობის შეწყვეტის რეალური მიზეზების დასახელება უჭირს ტელეკომპანიის გენერალურ დირექტორ თამარ ფხაკაძესაც, რომელიც ამ თანამდებობაზე ცოტა ხნის წინ დაინიშნა. ამბობს, რომ მუშაობაში აქტიურად არც ჩართულა და არ ფლობს კონკრეტულ ინფორმაციას იმაზე, თუ რატომ შეაჩერა ტელეკომპანიამ მუშაობა.

გავრცელებული ინფორმაციით, ტელეკომპანია „ტი-ვი-ესი“ თავიდან მოიაზრებოდა როგორც სპორტული ტელევიზია, მოგვიანებით გადაწყდა, რომ საერთო მაუწყებელი შექმნილიყო, იგეგმებოდა რომ ტელევიზიაში პოლიტიკურ თოქ-შოუს წამყვანი მაგდა ანიკაშვილი იქნებოდა, საინფორმაციო გამოშვებას კი „იმედიდან“ გადასული ლევან ჯავახიშვილი გაუძღვებოდა. რამდენიმე დღის წინ ტელეკომპანია „ტვ3“-ის რვა თანამშრომელმა ტელევიზია დატოვა და სამუშაოდ „ტი-ვი-ეს“- ზე გადავიდა.

ტელევიზიის ერთ-ერთი თანამშრომლის განცხადებით, ხელმძღვანელობამ მაუწყებლობის შეჩერების მიზეზად ტექიკური პრობლემა დაასახელა, მუშაობის განახლების სავარაუდო ვადად კი 6 თვე დაასახელა,

„სანამ სამუშაოები არ განახლდება, ხელფასს ვერ ავიღებთ, ამავე დროს გვითხრეს, რომ შეგვიძლია სხვა სამსახურები მოვძებნოთ“- აცხადებს არხის თანამშრომელი.

ჯერ-ჯერობით არ გავრცელებულა არხის დამფუძნებლების კომენტარი, საჯარო რეესტრის მონაცემებით, TVS-ის დამფუძნებელი ქეთევან ჯაფარიძეა. media.ge-ს ინფორმაციით, არხზე ინვესტიციებს ვახტანგ წერეთლი განახორციელებს. ვახტანგ წერეთელი ქართული სიგარეტის მწარმოებელი კომპანია "პირველის" მფლობელის ავთანდილ წერეთლის შვილია.

მომზადებულია გაზეთ „რეზონანსის“ მიხედვით