საქართველოს განათლებისა და მეცნიერების მინისტრი, თამარ სანიკიძე, ძალადობასთან დაკავშირებით კომენტარს აკეთებს. მინისტრის განმარტებით, აღნიშნული პრობლემის აღმოსაფხვრელად, საჭიროა ძალების გაერთიანება:

"ჩვენ დავინახეთ, რომ ცალ-ცალკე მუშაობა არ არის საკმარისი იმისათვის, რომ ეს პრობლემა მინიმუმამდე იყოს დაყვანილი. საჭიროა რესურსების კონსოლიდირება, უწყებების გაერთიანება, რომ ყველაფერი მოხდეს სისტემურად და მიზანმიმართულად; რომ ყველაფერი უშუალოდ ამ პრობლემის მოგვარებისკენ იყოს მიმართული. შესაბამისად, მოხდა შეთანხმება, შეიქმნება სამუშაო ჯგუფი, უშუალოდ პრემიერის ხელმძღვანელობით. მუშაობა უკვე მიმდინარეობს სტრატეგიაზე, რომელსაც შსს, სავარაულოდ, 25 ნოემბრისთვის წარმოადგენს, სადაც დეტალურად იქნება განხილული, რომელ სტრუქტურას რა კომპეტენცია ექნება და რა იქნება მათი როლი ამ პრობლემების მოგვარებაში.

რა თქმა უნდა, გარკვეული პროგრამები არსებობს. ჩვენ ვფიქრობთ როგორც ამის გაძლიერებაზე, ისე მოდიფიცირებაზე; განსაკუთრებული აქცენტი იქნება სამოქალაქო განათლების საგანზე, რომელიც ჩვენ გვაქვს ძირითადად მაღალ კლასებში, მაგრამ ჩვენ განვიხილავთ იმ შესაძლებლობასაც, რომ ისინი ჩამოვიტანოთ და უფრო ადრე დავიწყოთ ამის სწავლა განახლებული პროგრამით. მე ვფიქრობ, სტრატეგია იქნება ძალიან საინტერესო, ეს იქნება პირველადი დოკუმენტი", - განაცხადა თამარ სანიკიძემ.