საქართველოს კონსტიტუციაში სახელისუფლებო შტოებს შორის უფლებამოსილების გამიჯვნის საკითხს პოლიტიკოსები და ექსპერტები განიხილავენ. შეხვედრა, რომლის ინიციატორები გაერო და გერმანიის განვითარების ფონდი არიან, სასტუმრო თბილისი მარიოტში მიმდინარეობს. შეხვედრას საქართველოს პარლამენტის თავმჯდომარე დავით უსუფაშვილიც ესწრება.

შეხვედრაზე პოლიტიკოსებმა აღნიშნეს, რომ მალე აღარ იქნება გაუგებრობის მიზეზი პრეზიდენტისა და პრემიერის უფლებამოსილებებს შორის არსებული შეუსაბამობები. ამ საკითხთან ერთად შეკრებილი პოლიტიკოსები და კონსტიტუციონალისტები უცხოელ იურისტებთან ერთად სახელმწიფოს მოწყობის მოდელზეც მსჯელობენ. ისინი საპარლამენტო რესპუბლიკის იმ მოდელებს განიხილავენ, რომელთა მიხედვითაც შესაძლოა უკონფლიქტოდ გადანაწილდეს ძალაუფლება საქართველოში.

ადამიანის უფლებათა დაცვის კომიტეტის თავმჯდომარე ეკა ბესელია აცხადებს, რომ ქვეყნის კონსტიტუციაში შეტანილი ცვლილებებით, რომელიც ოქტომბრიდან ამოქმედდა, საქართველოს პრეზიდენტი ხდება სიმბოლური ფიგურა და ერთგვარი არბიტრი ხელისუფლების სხვადასხვა შტოებს შორის.

„ის არის ნეიტრალური არბიტრი. საკანონმდებლო ორგანოს აქვს თავისი უფლებამოსილება, როგორც საპარლამენტო რესპუბლიკის ძალიან მნიშვნელოვან ინსტიტუციას, მთავრობა, რომელიც გადაწყვეტილების აღსრულებაზეა პასუხისმგებელი და მას აქვს ძირითადი ფუნქცია საგარეო კუთხითაც, მათ შორის ხელშეკრულებების ხელმოწერა, მოლაპარაკებების წარმოების მიმართულებით და ის რამდენიმე წინააღმდეგობა, რომელიც დარჩა დღეს კონსტიტუციაში, ვფიქრობ, ამ ანალიზისა და საკონსტიტუციო კომისიის მუშაობის შემდეგ დალაგდება“, - განაცხადა ეკა ბესელიამ.

პრეზიდენტის საპარლამენტო მდივანმა გიორგი კვერენჩხილაძემ კი აღნიშნა, რომ საფუძველშივე მცდარია მოსაზრება პრეზიდენტის, როგორც სიმბოლური ფიგურის შესახებ.

„ამ სიმცდარეზე მიუთითებს თავად კონსტიტუციური ნორმები და ის უფლებამოსილებები, რომელიც პრეზიდენტს კონსტიტუციით აქვს გაწერილი. იქნება ეს თავდაცვის სფეროში, სამხედრო სფეროში, თუ სხვა სფეროებში, თუნდაც პარლამენტთან ურთიერთობების სფეროებში. ძალთა ბალანსში კორექტივების შეტანა აუცილებელი იქნება საკანონმდებლო ორგანოსა და აღმასრულებელი ხელისუფლების ურთიერთმიმართების კუთხით“, - განაცხადა გიორგი კვერენჩხილაძემ.

ადამიანის უფლებების სწავლებისა და მონიტორინგის ცენტრის ხელმძღვანელის, ვახუშტი მენაბდის განმარტებით, მთავარი პრობლემა კონსტიტუციაში იყო ძალაუფლების კონცენტრაცია. მისი აზრით, კონსტიტუციაში უნდა გაძლიერდეს პარლამენტი და გარკვეული უფლებამოსილება, რომელიც აქვს პრემიერს და მთავრობას, უნდა შემცირდეს.

„ჩვენ არ გვინდოდა ერთ ხელში, პრეზიდენტის ხელში კონცენტრირებული ძალაუფლება. მთავარი პრობლემა იყო ძალაუფლების კონცენტრაცია, თორემ სიტყვა პრეზიდენტის მიმართ კი არ ქონდა პრობლემა ვინმეს. თუ სიტყვა სპოერ საპრეზიდენტოდან გადავალთ სუპერ საპრემიერო მოდელზე, პრობლემა იგივე დარჩება“, - განაცხადა მენაბდემ.