სასჯელაღსრულების დეპარტამენტის ყოფილი მრჩეველი ლალი მოროშკინა ხელისუფლებას საბერძნეთსა და საფრანგეთში წაგებული საქმეების გამო აკრიტიკებს. მოროშკინა მიიჩნევს, რომ აუცილებელია მოხდეს მთავარი პროკურატურის რიგების გადახედვა.

„ხელისუფლება კიდევ ერთხელ უნდა დააფიქროს დათა ახალაიას საქმემ, ანუ რაც მოხდა საბერძნეთში. ეს უკვე მეორე ჩავარდნაა საფრანგეთში კეზერაშვილის საქმის შემდეგ. „ნაციონალებმა“ აქაც დახარჯეს დიდი ფული, საბერძნეთის სასამართლოში. კეზერაშვილის საქმესთან დაკავშირებით აბსოლუტურად არ იყო მომზადებული პროკურატურა და ანალოგიური მოხდა საბერძნეთშიც. როცა პროკურატურა ამდენ საქმეს აგებს, მისი რიგებიც უნდა გადაიხედოს.“ნაციონალების“ შავი ფული ტრიალებს და ხმარდება ასეთი საქმეების მოგებას. პროკურატურაში დევს ათასობით პატიმრის ჩვენება ყოფილი მაღალჩინოსნების შესახებ, ვინმე ამას კითხულობს?“,- აცხადებს მოროშკინა.

სხვათაშორის, მე დავაკვირდი და აღმოჩნდა, რომ დასვენების დღეებში ხელისუფლება საერთოდ გაჩერებულია, „ნაციონალები“ კი ინფორმაციას ინფორმაციაზე ავრცელებენ, ახალი თუ არ აქვთ, ძველს ავრცელებენ, არ ჩერდებიან.

სამუშაო დღეებში ხელისუფლება რას აკეთებს? არავინ არ მუშაობს საინფორმაციო უზრუნველყოფის თვალსაზრისით. ახლა, ალბათ შეუძლებელია იმ მკვლელობებისა და პედოფილების დაპატიმრება, ვინც მიხეილ სააკაშვილმა გაათავისუფლა, მაგრამ მათ წინააღმდეგ უნდა გატარდეს პრევენციული ზომები, უნდა დაწესდეს მკაცრი კონტროლი. მე არ ვიცი, უკვე მერამდენედ ვამბობ, რომ ესენი ამზადებენ სისხლიან დღეებს და მერე შეწუხებული ხალხი რა ჭკუაზე დადგება, არავინ იცის. პრინციპში, საზოგადოებისთვის აღარ აქვს მნიშვნელობა, სააკაშვილის მიერ დავალებულ-დაქირავებული მკვლელები შეაწუხებენ, თუ სხვა სახის კრიმინალები, ორივე შემთხვევაში ხელისუფლება აგებს პასუხს. უნიათობა და გულგრილობა იგივე დანაშაულს უტოლდება, რასაც „ნაციონალები“ სჩადიან. იმის გამო, რომ ყოფილი ხელისუფლება ქვეყანაში სიტუაციას ურევს, დღევანდელ ხელისუფალს შეღავათი ვერ ექნება. მოხვედი? ახლა ნება იბოძე და ქვეყანა დაალაგე“, - განაცხადა მოროშკინამ „ალიასთან“ საუბრისას.

წყარო: გაზეთი „ალია“