სასჯელაღსრულების დეპარტამენტის ყოფილი მრჩეველი ლალი მოროშკინა, კახი კახიშვილის სასჯელაღსრულების მინისტრის პირველ მოადგილედ დანიშვნას მიესალმება და აცხადებს, რომ კახიშვილის თანამდებობაზე დანიშვნა სერიოზული „წმენდის“ დასაწყისია.

„მე მივესალმები კახი კახიშვილის დანიშვნას სასჯელაღსრულების მინისტრის მოადგილედ. ეს უკვე მიანიშნებს იმაზე, რომ სხვა სტრუქტურებშიც განხორციელდება ცვლილებები. კახის თავზე ვაზელინი არ ესვა და არავის უძვრებოდა, ის ყოველთვის ღიად ლაპარაკობდა, კახიშვილის დანიშვნა სწორედ ამ წმენდის დასაწყისია. ასევე, ამაზე მიანიშნებს სანდრო ბრეგაძის გადაყვანა დიასპორის სამინისტროში. არც ეს ადამიანი ერიდება ღია კრიტიკას, როცა რაიმე არ მოსწონს. მერწმუნეთ, უკვე დაწყებულია ფსონის დადება იმ ადამიანებზე, რომლებსაც ვაზელინი არ უსვიათ თავზე. ჩემი ინფორმაციით, ანალოგიური წმენდა ჩატარდება „საზოგადოებრივი მაუწყებლის“ უცხოურ ბიუროებში რათა გამაგრდეს ჩვენი სახელმწიფოს პოზიციები ევროსტრუქტურებში, ანუ რეალური ინფორმაცია წავიდეს საქართველოდან და ასევე ნორმალური ინფორმაცია მივიღოთ ევროპიდან თუ ამერიკიდან. „საზოგადოებრივ მაუწყებელს“ თითქმის ყველა წამყვან ქვეყანაში აქვს გახსნილი ბიურო, მაგრამ, სამწუხაროდ, არსად არ მუშაობენ ნორმალურად. ჩვენ ამ ტელევიზიის არსებობისთვის ყოველწლიურად მილიონობით ლარს ვიხდით“, - განაცხადა მოროშკინამ.

წყარო: გაზეთი „ალია“