საქართველოს საგარეო საქმეთა მინისტრი, მაია ფანჯიკიძე გერმანიის მრეწველთა აღმოსავლეთ ევროპის ასოციაციის პრეზიდენტს მარკუს ფელსნერს შეხვდა.

შეხვედრაზე მხარეებმა საქართველოსთან თანამშრომლობის საკითხები განიხილეს. გერმანიის მრეწველთა ასოციაციის პრეზიდენტმა განსაკუთრებით აღნიშნა საქართველოს მიერ ბოლო წლებში მიღწეული წარმატებები და აღნიშნა, რომ ამ ფონზე ასოციაციისთვის საქართველო მიმზიდველი ქვეყანა ხდება, სადაც საშუალო ფენის განვითარებაზე მუშაობა შესაძლებელია. მისივე თქმით, მისი ორგანიზაცია ხელს შეუწყობს საქართველოში გერმანული ბიზნესით დაინტერესებას.

"გვინდა ხელი შევუწყოთ საშუალო ფენის განვითარებას. დარწმუნებულები ვართ, რომ იქ სადაც მეტად არის განვითარებულ დემოკრატია და სამართლებრივი სახელმწიფოს პრინციპები, ამ ფენასთან თანამშრომლობაც უფრო პერსპექტიულია. დღეს მსოფლიოში ძალიან ცოტა ქვეყანაა, რომელმაც ისევე სწრაფად და წარმატებით შეძლო განვითარება, როგორც ეს საქართველომ მოახერხა", - განაცხადა მარკუს ფელსნერმა.

შეხვედრის დეტალებზე საგარეო საქმეთა მინისტრმაც ისაუბრა. მაია ფანჯიკიძის განცხადებით, შეხვედრაზე განვიხილეთ ის სფეროები, სადაც შესაძლებელია ერთობლივი მუშაობა.

"ეს არის პროფესიული განვითარება, ხალთა შორის ურთიერთგაგების ხელშეწყობა, სხვადასხვა სახის სტიპენდიები ქართველი ახალგაზრდებისათვის გერმანიაში", - განმარტა ფანჯიკიძემ.