პრემიერის სახლთან მომხდარი ინციდენტი სიტყვის თავისუფლების გამოხატვის წინააღმდეგ განხორციელებულ ქმედებად შეაფასა „ნაციონალური მოძრაობის“ ერთ-ერთმა ლიდერმა გიგა ბოკერიამ. ის ივანიშვილის რეჟიმს აფრთხილებს, რომ „თავისუფალი პროტესტის აღკვეთა ამ ზომით და ჩახშობის მცდელობა, კი არ აჩერებს ამ პროცესს, არამედ აათმაგებს მას, და ამ მეთოდებით ისინი პროტესტს ვერ გააჩერებენ“.

გიგა ბოკერიამ ამ საკითხზე პრემიერის განცხადებას „აღმაშფოთებელი და ბრიყვული“ უწოდა. მისი თქმით, „ის, რასაც ღარიაბაშვილი დესტრუქციულ მოქმედებებს ეძახის, სინამდვილეში არის რეალურად სიტყვის თავისუფლება და პოლიტიკური თავისუფლება“.

„ნაციონალურ მოძრაობაში“ აღნიშნავენ, რომ პრემიერი საკუთარ თავს საქართველოსთან აიგივებს და მის წინააღმდეგ წარმოებულ აქციას საქართველოს წინააღმდეგ აქციად აღიქვამს. ხათუნა გოგორიშვილის განცხადებით „დემოკრატიულ ქვეყნებში აქციები და პროტესტი ჩვეულბერივი ფორმაა და ღარიბაშვილს თუ უნდა, რომ იყოს სახელმწიფო თანამდებობაზე, ამასაც გაგებით უნდა მოეკიდოს“.

მოსაშვილის ქუჩაზე პრემიერმინისტრ ირაკლი ღარიბაშვილის სახლთან 19 ოქტომბერს მომხდარ ინციდენტთან დაკავშირებით 7 ადამიანი წუხელ, გვიან ღამით დააკავეს.