საქართველოსა და რუსეთის პრეზიდენტების შეხვედრაზე მუშაობა არ მიმდინარეობდა

საქართველოსა და რუსეთის პრეზიდენტების შეხვედრაზე მუშაობა არ მიმდინარეობდა - ზალკალიანი

პოლიტიკა - 15:00, 20 Oct, 2014

1207

დავით ზალკალიანმა ჟურნალისტებთან პრეზიდენტის ყოფილი მრჩევლის, ვანო მაჭავარიანის განცხადების შესახებ კომენტრაი გააკეთა. მაჭავარიანის გავრცელებული ინფორმაციით მზადდებოდა საქართველოსა და რუსეთის პრეზიდენტების შეხვედრა, რომელიც მთავრობის წინააღმდეგობის გამო ჩაიშალა.
ზალკალიანის თქმით, არანაირი დიპლომატიური არხებით საქართველოსა და რუსეთის პრეზიდენტების შეხვედრაზე მუშაობა არ მიმდინარეობდა. საგარეო საქმეთა მინისტრის პირველი მოადგილე აცხადებს, რომ თუ მაჭავარიანს რაიმე საქმიანობა ჰქონდა დიპლომატიური ურთიერთობების ჩარჩოებს მიღმა, ეს მისთვის უცნობია. თუმცა, რუსეთისა და საქართველოს პრეზიდენტების მიერ საჯაროდ გაკეთებული განცხადებების იქეთ მსგავსი შეხვედრის მომზადებაზე საქმე არ წასულა.
"ჩვენთვის ცნობილი იყო ის საჯარო განცხადებები, რომელიც გაკეთდა იმ პერიოდში. ამის იქეთ საუბარი არ წასულა. მოგეხსენებათ, რომ ვიზიტების ორგანიზება ძალიან სერიოზული საკითხია და საგარეო საქმეთა სამინისტრო უნდა იყოს ჩართული და დიპლომატიური არხების საშუალებით ხორციელდება ყველა საორგანიზაციო საკითხის შეთანხმება. რუსეთთან ჩვენ არ გვაქვს დიპლომატიური ურთიერთობა. აქედან გამომდინარე, ეს უნდა მომხდარიყო შვეიცარიის კონფედერაციის საშუალებით, არანაირი არათუ ნოტა, ოფიციალური წერილიც კი არ გაგვიგზავნია იმის იქეთ, რაც მოგახსენეთ, რომ იყო საჯარო განცხადებები. აქედან გამომდინარე, ჩვენ არ ვმუშაობდით ამ ვიზიტზე, თუ ვანო მაჭავარიანს რაიმე საქმიანობა ჰქონდა ამ დიპლომატიური ურთიერთობების ჩარჩოებს მიღმა, ეს ჩემთვის უცნობია", - განაცხადა დავით ზალკალიანმა.
ვანო მაჭავარიანი აცხადებს, რომ პრეზიდენტის ადმინისტრაციაში მარგველაშვილ-პუტინის შეხვედრა მზადდებოდა, რომელიც იმის გამო ჩაიშალა, რომ ეს შეხვედრა საქართველოს მთავრობამ არ მოინდომა.