დღეს აჭარის მთავრობის თავმჯდომარე, არჩილ ხაბაძე, უკრაინის საპატიო კონსულს, ალექსანდრე აკიმოვს დაემშვიდობა. ალექსანდრე აკიმოვის თქმით, უკრაინის მთავრობამ სხვადასხვა ქვეყნებში 20-მდე საკონსულოს მუშაობა შეაჩერა რაც ძირითადად ფინანსურ პრობლემებს უკავშირდება. ხაბაძისა და აკიმოვის დამშვიდობების მიზეზიც ამჟამად უკრაინის საკონსულოს ბათუმის ფილეალის დახურვა გახდა.

„პირველ რიგში მადლობა მინდა გადავუხადო ბატონ ალექსანდრეს ნაყოფიერი მოღვაწეობისთვის. ჩვენ შევაჯამეთ ბატონი კონსულის აჭარაში მუშაობის პერიოდი და ვფიქრობთ სამომავლოდ, როდესაც გამოსწორდება მდგომარეობა უკრაინაში, ისევ აღდგება საკონსულოს ფუნქციონირება აჭარაში. ბოლო წლებში უკრაინელი ტურისტების ნაკადი გაიზარდა, ამიტომაც ვფიქრობ ბათუმში უკრაინის საკონსულოს არსებობა აუცილებელია. მით უფრო, რომ ეს საკონსულო არა მარტო აჭარის, არამედ სამეგრელო-გურიის რეგიონებსაც ემსახურებოდა”,- განაცხადა არჩილ ხაბაძემ უკრაინის კონსულთან გამომშვიდობების შემდეგ.

აჭარა უკრაინელი დამსვენებლებისთვის ერთ-ერთ მნიშვნელოვან ადგილს წარმოადგენს. გასულ წელს მხოლოდ აჭარაში 15%-ით გაიზარდა უკრაინიდან ტურისტთა რაოდენობა.

საქართველოსა და უკრაინას შორის დიპლომატიური ურთიერთობები დამყარდა 1992 წლის 22 ივლისს. საქართველოსა და უკრაინას შორის არსებული სახელშეკრულებო-სამართლებრივი ბაზა მოიცავს 105 ორმხრივ და მრავალმხრივ ხელშეკრულებას და არეგულირებს ორ ქვეყანას შორის ურთიერთობათა პრაქტიკულად ყველა სფეროს.