„ასეთ მძიმე მდგომარეობაში მყოფი ქვეყანა ფეხზე დამდგარიყოს ორ წელიწადში, ეს არის გამორიცხული", - აღნიშნული განცხადება, საქართველოს პრემიერ-მისნიტრმა ირაკლი ღარიბაშვილმა სამთავრობო პროგრამის „აწარმოე საქართველოში“ ახალი კომპონენტის „მიკრო და მცირე მეწარმეობის ხელშეწყობა საქართველოში“ პრეზენტაციაზე სიტყვით გამოსვლისას გააკეთა.

ღარიბაშვილმა ქვეყანაში შექმნილ სოციალურ მდგომარეობაზე ისაუბრა და აღნიშნა, რომ ყოფილი ხელისუფლების წარმომადგენლები, მოსახლეობას უქმნიან ილუზიას, რომ პრობლემების მოგვარება ორ წელიწადში შესაძლებელია.

„ ორი მილიონი ადამიანი, ანუ ყოველი მეორე ადამიანი არის ღარიბი ჩვენს ქვეყანაში და დღეს გამოდიან ყოფილი ხელისუფლების წარმომადგენლები, რომელსაც მე მიმაჩნია, რომ არ აქვთ უფლება განაცხადონ, რომ ამ ორ მილიონ ღარიბ ადამიანს რატომ ვერ უშველა სახელმწიფომ ორი წლის განმავლობაში. დამისახელოს ნებისმიერმა პროფესორმა, ნებისმიერმა ჩვენზე მეტად მცოდნე, გამოცდილმა ადამიანმა, ერთ მაგალითი, თუნდაც რომელიმე ქვეყნის პრეცედენტი მოიყვანოს, სადაც ასეთ მძიმე მდგომარეობაში მყოფი ქვეყანა ფეხზე დამდგარიყოს ორ წელიწადში. ეს არის გამორიცხული, ეს არის ილუზია, რომელსაც უქმნიან მოსახლეობას და კიდევ ერთხელ შეჰყავთ შეცდომაში ჩვენი ქვეყნის მოსახლეობა. ეს არის გამორიცხული, მაგრამ გამორიცხული არ არის ის, რაც ჩვენ დავიწყეთ და შეუძებელი არ არის ის, რაზეც ჩვენ ვსაუბრობთ. ეს არის ის, რომ ჩვენ უნდა განვავითაროთ სოფლის მეურნეობა და გავაძლიეროთ სოფელი", -განაცხადა პრემიერმა.