საქართველოში ოფიციალური ვიზიტით იმყოფება ისრაელის აბსორბაციის მინისტრი. სოფია ლანვერი თბილისში ისრაელი-საქართველოს 26-საუკუნოვან იუბილესთან დაკავშირებით ჩამოვიდა. სტუმარს აეროპორტში დიასპორის საკითხებში სახელმწიფო მინისტრი დახვდა. გელა დუმბაძემ ვიზიტის მნიშვნელობაზე გაამახვილა ყურადღება და განაცხადა, რომ ამ სამინისტროს გამოცდილების გაზიარება მისი უწყების ეფექტური მუშაობისთვის სასარგებლო იქნება.

"ჩემთვის, პირადად, ძალიან მნიშვნელოვანია აბსორბციის სამინისტროს მრავალწლიანი გამოცდილება, რომელიც მიმართული არის მიგრანტების დასაქმებასთან, ინტეგრაციასთან და სხვადასხვა ნიუანსებთან", - განაცხადა დიასპორის სახელმწიფო მინისტრმა.

სოფია ლანვერს დაგეგმილი აქვს ოფიციალური შეხვედრები საქართველოს პრემიერ მინისტრთან და ასევე მის ქართველ კოლეგასთან. შეხვედრებზე ორ ქვეყანას შორის არსებული ურთიერთობებისა და სამომავლოდ თანამშრომლობის პერსპექტივებზე ისაუბრებენ. სოფია ლანვერის განცხადებით, ისრაელისთვის საქართველოს მხარდაჭერა, რომელიც ბოლო კვირების განმავლობაშიც იგრძნობოდა, ძალიან მნიშვნელოვანია და ის ქართულ-ებრაული ურთიერთობების გაღრმავების მომხრეა.

"საქართველოში პირველად არ ვარ და კარგად ვიცი ჩვენს შორის არსებული ურთიერთობების შესახებ, რომელიც 2600 წელია გრძელდება და ვისრვებდი, რომ ეს ურთიერთობები კიდევ უფრო გაღრმავდეს როგორც ეკონომიკის, ისე კულტურის სფეროში", - განაცხადა სტუმარმა.