პარლამენტის თავდაცვისა და უშიშროების კომიტეტის თავჯდომარის, ირაკლი სესიაშვილის თქმით აფხაზეთთან მიმართებაში ამოქმედდა რუსული გეგმა „აფხაზეთი აფხაზების გარეშე“.

ასე შეაფასა სესიაშვილმა „კურიერის“ პირდაპირ ეთერში რუსეთსა და ოკუპირებულ აფხაზეთს შორის მოსალოდნელი ახალი სამხედრო ხელშეკრულების გაფორმების გადაწყვეტილება.

სესიაშვილი ამბობს, რომ ქართული მხარის კონსტრუქციული ნაბიჯების მიუხედავად, რუსეთი დესტრუქციულად იქცევა.

„სამწუხაროდ, ის პირდაპირ ურტყამს ჩვენს აფხაზ მოქალაქეებს. როგორც ჩანს, აფხაზეთის დღევანდელმა ხელისუფლებამ დაიწყო მზაკვრული გეგმის განხორციელება „აფხაზეთი აფხაზების გარეშე“ და ამას აფხაზები კარგად ხედავენ და გრძნობენ, რომ ჩვენ ფრონტის ერთ მხარეს ვდგავართ,“ - განაცხადა ირაკლი სესიაშვილმა.

რაც შეეხება პრემიერის ახალ ინიციატივას, რომელიც აფხაზეთთან მიმართებაში ახალ გეგმას ითვალისწინებს, თავდაცვისა და უშიშროების კომიტეტის თავმჯდომარე ამბობს, რომ ამის შესახებ პრემიერი თავად ისაუბრებს უახლოეს დღეებში.