გვჭირდება უფრო ეფექტიანი გადაწყვეტილების მიღების სისტემა- არჩილ გეგეშიძე

პოლიტიკა - 21:17, 18 Oct, 2014

909

საგარეო მიმართულებით, საქართველოს მთავრობას აქვს მთელი რიგი ნაბიჯები გადასადგმელი, რათა უფრო შედეგიანი იყოს საგარეო პოლიტიკა, ამის შესახებ საქართველოს სრულუფლებიანმა და საგანგებო ელჩმა ამერიკის შეერთებულ შტატებში არჩილ გეგეშიძემ მთავრობის ადმინისტრაციაში პრემიერ-მინისტრის ხელმძღვანელობით გამართული გაფართოებული თათბირის დასრულების შემდეგ ჟურნალისტებს განუცხადა
"გამოწვევები არის ქვეყნის წინაშე. სიტუაცია მარტივი არ არის, უფრო მეტიც, რთულდება კიდეც ჩვენს გარშემო, რეგიონში, მსოფლიოში და შესაბამისად, საგარეო მიმართულებით, საქართველოს მთავრობას აქვს მთელი რიგი ნაბიჯები გადასადგმელი იმისათვის, რომ უფრო ეფექტიანად ვუპასუხოთ ამ გამოწვევებს და უფრო შედეგიანი იყოს ჩვენი საგარეო პოლიტიკა", - აღნიშნა არჩილ გეგეშიძემ.
საქართველოს ელჩი რუსეთის ფედერაციასა და დე ფაქტო აფხაზეთს შორის ხელშეკრულების მოსალოდნელი გაფორმების საკითხსაც გამოეხმაურა.
"ზოგადად, ეს ჩვენს გარშემო არსებულ ვითარებას გამოწვევის სახით აყალიბებს ჩვენს წინაშე, შესაბამისად, ჩვენ არა მარტო ამ კონკრეტული საკითხის გამო, ბევრი სხვა საკითხის გამო, გვჭირდება უფრო ეფექტიანი გადაწყვეტილების მიღების სისტემა, რომ ვიყოთ პროაქტიულები ამ გამოწვევების წინაშე და სადაც შესაძლებელია და როგორც შესაძლებელია, მოვახდინოთ ყველაფრის იმის პრევენცია, რასაც შეიძლება ნეგატიური შედეგები მოჰყვეს", - აღნიშნა არჩილ გეგეშიძემ.
მისივე თქმით, საგარეო პოლიტიკის ორიენტირები არ იცვლება და საგარეო პოლიტიკური კურსი ცნობილია.