სახელმწიფო რწმუნებულის-გუბერნატორის ადმინისტრაციაში სამხარეო-საკონსულტაციო საბჭოს პირველი სხდომა გაიმართა, რომელსაც გურიის მხარის გუბერნატორი, გიორგი ჩხაიძე ხელმძღვანელობდა. საბჭოს შემადგენლობაში შედიან: გუბერნატორი,გურიის რეგიონის მუნიციპალიტეტების გამგებლები , საკრებულოს თავმჯდომარეები , მათი მოადგილეები და ქ. ოზურგეთის მერი. სხდომას ასევე ესწრებოდნენ საქართველოს რეგიონული განვითარებისა და ინფრასტრუქტურის სამინისტროს თვითმართველობის განვითარებისა და რეგიონული პოლიტიკის დეპარტამენტის უფროსი გიორგი წაქაძე და ამავე სამინისტროს წარმომადგენელი მამუკა აბულაძე.

სხდომაზე განხილულ იქნა დღის წესრიგით გათვალისწინებული სხვადასხვა საკითხი, მათ შორის დარგობრივი სამუშაო ჯგუფების შექმნის შესახებ, რომლებიც თითოეულ მუნიციპალიტეტში მოსახლეობის ინტერესების გათვალისწინებით, პრიორიტეტების განსაზღვრასა და შესაბამისი პროექტების შემუშავებაში მიიღებენ მონაწილეობას.

ასევე, მოხდა სამინისტროს წარმომადგენლების მხრიდან რეგიონული განვითარების სტრატეგიების სამოქმედო გეგმის მეთოდოლოგიის გაცნობა და საბჭოს მიერ მისი მოწონება. საბჭოს წევრებს დაევალათ დარგობრივი სამუშაო ჯგუფების შექმნა. დებულების თანახმად, სამხარეო – საკონსულტაციო საბჭო წინასწარ განსაზღვრული პერიოდულობით შეიკრიბება.