ბებიას ისედაც შავი ეცვა სულ, იმ დღეს თავზე წაიკრა საგანგებოდ- ქალების უბედურ დღეს ვგლოვობო

სოც.მედია - 23:28, 17 Oct, 2014

7588

ქართველი პოეტი და საჯარო ბიბლიოთეკის დირექტორი გიორგი კეკელიძე ქალთა მიმართ ძალადობის შესახებ საკუთარ ლიტერატურულ პროექტში „გურული დღიურები“ წერს:

"გურული დღიურები არც ისე დიდი ხნის წინ დავწერე. დღეს კიდევ ერთი საშინელი ამბავი მოხდა: ,,ერთხელ გურიაში მამამთილმა რძალს ცხელი წყალი გადაასხა და ის ქალი კინაღამ დამწვრობისგან გარდაიცვალა. სხვა სოფელში მოხდა. უცხო ხალხში. ბებიას ისედაც შავი ეცვა სულ, რაც თავი მახსოვს, მაგრამ ხანდახან თავშალს იხსნიდა. იმ დღეს თავზე წაიკრა საგანგებოდ. თქვა: ქალების უბედურ დღეს ვგლოვობო. პატარა ვიყავი და მიკვირდა.
ახლა, რომ გადავხედე მისი ბიოგრაფიის ჩემთვის ნაცნობ ნაწილს, ნამდვილი ფემინისტი იყო. თავგამოდებით იბრძოდა, რომ სკოლისა და ბიბლიოთეკის დირექტორი ქალი ყოფილიყო სოფელში. ყველა კაცს აკრიტიკებდა, ვისზეც გაიგებდა, ცოლს შეაგინაო და ხელის გარტყმაზე ხომ - საერთოდ. ცხადია, ფემინიზმის თეორიისა ნათელამ (ბებიაჩემის სახელია) ბევრი არაფერი იცოდა, - ის კონტექსტი, სადაც გაიზარდა და განათლება მიიღო, ამ ყველაფერს ნაკლებად გულისხმობდა, - მაგრამ მთავარი ხომ ეს არ არის...
ამ ბლოგის დაწერისკენ ბოლო დროს დატრიალებულმა მოვლენებმა მიბიძგა: უკანასკნელი თვეების განმავლობაში 17 ქალი მოკლეს. ბებიაჩემი დღეს ცოცხალი აღარ არის. რომ ყოფილიყო, ის იქნებოდა პირველი, ვინც ხმამაღლა იტყოდა: „არა ქალებზე ძალადობას!" ხმამაღლა და გადამდებად. იმედი მაქვს, ამ ბლოგს, თუნდაც მისი ძალით, ცოტა რამ მაინც სცხია გადამდებობის და თქვენც იმავეს იტყვით და უაზრო ტრადიციას უაზროდვე არ გაუჯიუტდებით, ჩემი „სიშავის" ამბისა და ბავშვური გაჯიქებისა არ იყოს. თქვენი იმედი მაქვს.''