„ერთიანი ნაციონალური მოძრაობის“ რეზოლუციის ტექსტი აფხაზეთის საკითხთან დაკავშირებით პარლამენტმა 23 ხმით 53-ის წინააღმდეგ, არ მიიღო. კენჭისყრის შედეგად, 80 არცერთის წინააღმდეგ საქართველოს პარლამენტმა უმრავლესობის მიერ მომზადებული რეზოლუცია დაამტკიცა.

„საქართველოს პარლამენტი გმობს რუსეთის ფედერაციის მცდელობას, მოახდინოს ოკუპირებული აფხაზეთის ანექსია. მიმართავს საერთაშორისო თანამეგობრობას, გააძლიეროს ძალისხმევა საერთაშორისო წესრიგისა და სამართლის ნორმების დასაცავად, ყველა შესაძლო ბერკეტის გამოყენებით. საქართველოს ევროპული და ევროატლანტიკური ინტეგრაცია უზრუნველყოფს აფხაზი ხალხის კანონიერი ინტერესების სრულფასოვან დაცვას და განვითარების პერსპექტივას. მიმდინარე საერთაშორისო მასშტაბის კონფლიქტების ექსკალაციის ტენდენციის ფონზე, დაძაბულობის ახალ კერათა წარმოშობის პრევენციის, ადამიანის უფლებების მასობრივ დარღვევათა საშიშროების თავიდან აცილების აუცილებლობიდან გამომდინარე, საქართველოს პარლამენტი მხარს უჭერს საქართველოს მთავრობას, რათა ოკუპირებულ ტერიტორიებზე არსებული ვითარება პრიორიტეტულ თემად იქცეს რუსეთსა და საქართველოს, პარტნიორ ქვეყნებს შორის ურთიერთობათა პროცესში, აგრეთვე საერთაშორისო ფორუმებზე უსაფრთხოების მსჯელობისას", - ნათქვამია რეზოლუციაში.