ამ დღეებში რუსეთმა კიდევ ერთხელ გამოავლინა თავისი აგრესიული პოლიტიკა საქართველოს მიმართ, რითაც ფაქტობრივად აგრძელებს საერთაშორისო სამართლის უხეშ დარღვევას და 2008 წლის სექტემბერში აღებული ვალდებულებების იგნორირებას.

ა.წ. 13 ოქტომბერს გამოქვეყნდა ”რუსეთის ფედერაციისა და აფხაზეთის რესპუბლიკას შორის მოკავშირეობისა და ინტეგრაციის შესახებ ხელშეკრულების" პროექტი.

ხელშეკრულების პროექტის თანახმად, რუსეთსა და ”აფხაზეთის რესპუბლიკას” ექნებათ თავდაცვისა და უსაფრთხოების ერთიანი სივრცე საერთო სამხედრო ინფრასტრუქტურით ანუ ჯარით, ე.წ. აფხაზეთის რესპუბლიკის ”სახელმწიფო საზღვრების” ერთობლივი დაცვით, რაც თავისთავად ითვალისწინებს რუსეთ-საქართველოს სახელმწიფო საზღვრის ფაქტობრივად მდინარე ენგურზე გადმოტანას; ოკუპირებული აფხაზეთის ტერიტორიაზე ასევე იმოქმედებს შინაგან საქმეთა ერთობლივი ორგანოები. ”ხელშეკრულების” ეს და სხვა პუნქტები განაპირობებს რუსეთის მიერ მეზობელი სახელმწიფოს - დამოუკიდებელი საქართველოს ტერიტორიის ანექსიის იურიდიულად გაფორმების დაუფარავ მცდელობას.

აღნიშნული ქმედებით რუსეთი საქართველოს დეოკუპაციასა და ტერიტორიული მთლიანობის აღდგენას ეწინააღმდეგება, რითაც სერიოზულ საფრთხეს უქმნის რუსეთ-საქართველოს ურთიერთობების ნორმალიზების პროცესს, რომელსაც ჩვენი ქვეყნის ხელისუფლება ყველანაირად ხელს უწყობს.

საუბარი ”ორი ქვეყნის” - რუსეთისა და არაღიარებული აფხაზეთის რესპუბლიკის სახელით მაშინ, როცა მსოფლიო თანამეგობრობა აფხაზეთს აღიარებს საქართველოს განუყოფელ, მაგრამ დროებით ოკუპირებულ ტერიტორიად, საიდანაც გამოდევნილია მოსახლეობის უმრავლესობა, საერთაშორისო იურიდიულ ნორმებს ეწინააღმდეგება.

აფხაზეთის ავტონომიური რესპუბლიკის უმაღლესი საბჭო პროტესტს აცხადებს რუსეთის მორიგი პოლიტიკური დივერსიული ქმედებების გამო და მოუწოდებს საერთაშორისო თანამეგობრობის წევრ ქვეყნებს ხმა აღიმაღლონ რუსეთის დამპყრობლური გეგმების მიმართ, რაც ფაქტობრივად არის საქართველოს სუვერენიტეტის ხელყოფა და ლტოლვილთა და მათ შთამომავალთა მუდმივ საცხოვრებელ ადგილზე დაბრუნების უცილობელი უფლების დარღვევა.

http://scara.gov.ge/ka/2011-09-08-07-44-18/641-2014-10-17-10-26-18.html