პრემიერმა თქვა, რომ აფხაზებმა უნდა შეინარჩუნონ თავიანთი იდენტობა თავისუფალ სივრცეში

პრემიერმა თქვა, რომ აფხაზებმა უნდა შეინარჩუნონ თავიანთი იდენტობა თავისუფალ სივრცეში - ალასანია

პოლიტიკა - 18:00, 17 Oct, 2014

1600

საქართველოს თავდაცვის მინისტრის განცხადებით, პრემიერმა ირაკლი ღარიბაშვილმა თქვა, რომ რუსეთის მიერ წარმოებული პოლიტიკა თვითონ აფხაზების ინტერესებსაც ეწინააღმდეგება, - ამის შესახებ განცხადება ირაკლი ალასანიამ ჟურნალისტებთან გააკეთა.
ალასანია ამით პრემიერ-მინისტრ ირაკლი ღარიბაშვილის მიერ რუსეთსა და აფხაზეთს შორის "ინტეგრაციისა და თანამშრომლობის შესახებ" შეთანხმების თაობაზე გაკეთებულ კომენტარს გამოეხმაურა. "ყველამ კარგად ვიცით რაც იყო, ეს იყო ქართველების წინააღმდეგ ჩადენილი ეთნიკური წმენდა. მათ შორის იმ ადამიანების დახვრეტა, რომელიც განხორციელდა 27 სექტემბერს. აქედან გამომდინარე, დღეს გვაქვს ფაქტობრივად ოკუპაცია და ანექსიის დასაწყისი. პრემიერი რას გულისხმობს მე გეტყვით, რაც მან თქვა არის ის, რომ ეს პოლიტიკა, რასაც რუსეთი აწარმოებს, თვითონ აფხაზების ინტერესებსაც ეწინააღმდეგება. მათ უნდათ შეინარჩუნონ საკუთარი იდენტობა, ამას შეინარჩუნებენ მხოლოდ და მხოლოდ თავისუფალ სივრცეში - საქართველოსთან ერთად ევროპაში. ეს არის ის მესიჯი და გზავნილი, რაც პრემიერმა გაუგზავნა აფხაზებს", - განაცხადა ირაკლი ალასანიამ. საქართველოს პრემიერ-მინისტრმა ირაკლი ღარიბაშვილმა გუშინ ჟურნალისტებთან საუბრისას განაცხადა, რომ "ინტეგრაციისა და თანამშრომლობის შესახებ" შეთანხმება, შემაშფოთებელია. პრემიერი მიიჩნევს, რომ თუ რუსეთსა და აფხაზეთს შორის ხელშეკრულება ამ ფორმით გაფორმდება, ის, პირველ რიგში იქნება საფრთხის შემცველი აფხაზებისთვის, "როგორც ჩვენთვის ძალიან ძვირფასი ერისთვის"."არ მინდა დავიჯერო, რომ აფხაზეთის მოსახლეობა და აფხაზი ერი სწორედ ამისკენ მიისწრაფვის. ეს პირდაპირ ეწინააღმდეგება მათ მიერ წარმოებულ 25-წლიან ბრძოლას თვითგამორკვევისთვის, აღიარებისა და ე.წ დამოუკიდებლობის მიღწევისთვის. ჩემი ინფორმაციით, აფხაზეთში არაერთგვაროვანი პოზიცია დაფიქსირდა, საკმაოდ კრიტიკული დამოკიდებულება აქვთ ამ ტექსტის მისამართით",- განაცხადა პრემიერმა.