საქართველოს განათლებისა და მეცნიერების ყოფილი მინისტრი, დიმიტრი შაშკინი სტატუსშეჩერებულ სტუდენტებთან დაკავშირებით განცხადებას ავრცელებს. შაშკინის განმარტებით, თამარ სანიკიძე ადეკვატურად ვერ აფასებს სტატუსშეჩერებული სტუდენტების რაოდენობის 300 პროცენტიან ზრდას:

„სამწუხაროდ, მე არ მაქვს იმედი, რომ განათლების მავნებელი მინისტრი სანიკიძე ადეკვატურად აფასებს იმას, თუ რამდენად დიდ პრობლემას წარმოადგენს სტატუს შეჩერებული სტუდენტების რაოდენობის 300%-ით ზრდა. ის აგრძელებს საზოგადოებისთვის თვალებში ნაცრის შეყრას და პრობლემის იგნორირებას. ამიტომ, მე მივმართავ ქართულ საზოგადოებას და ყველა იმ ადამინას, ვისაც სჯერა იმის, რომ განათლებაზე არის დამოკიდებული საქართველოს მომავალი:

2012 წლის ივნისში,პრეზიდენტ სააკაშვილის დავალებით, ჩვენ შევიმუშავეთ კანონპროექტი, რომელიც აგვარებდა სტატუს შერჩებული სტუდენტების პრობლემას. კერძოდ, კანონში უმაღლესი განათლების შესახებ უნდა შესულიყო ცვლილება, რის შედეგად, ყოველ უმაღლეს სასწავლებელს დაევალებოდა, რომ სასწავლებლის ბიუჯეტის 5% მიმართული ყოფილიყო წარჩინებული სტუდენტების სასწავლო გრანტებით უზრუნველყოფაზე. ანუ, ყველა სასწავლებელში იქმნებოდა ფონდი, რომლის მეშვეობით კარგი სტუდენტები მიიღებდნენ სასწავლო გრანტებს. მაგალითად, თბილისის სახელმწიფო უნივერსიტეტი გამოყოფდა 3 500 000 ლარს წელიწადში თსუ-ს ფონდისთვის, რადგან მისი ბიუჯეტი ამჟამად აღემატება 70 000 000 ლარს. ამითი მარტო თსუ-ში, 1 500 სტუდენტს სასწავლო გრანტის მიღების შესაძლებლობა შეექმნებოდა.

5% არ არის ის ვალდებულება, რომელიც ფინანსურ პრობლემებს შეუქმნიდა უნივერსიტეტებს; ამავრდოულად იქმნებოდა სტატუს შეჩერებული სტუდენტების პრობლემის მოგვარების წინაპირობა.

ამ კანონის მიღება ვერ მოვასწარით არჩევნების გამო. ახალმა მინისტრებმა, ჯერ მარგველაშვილმა და მერე სანიკიძემ, არ ისურვეს ამ პრობლემებით თავის შეწუხება. შედეგად, ჩვენ მივიღეთ 33 000 სტატუს შეჩერებული სტუდენტი. ახლაც შეიძლება ამ მარტივი კანონის ცვლილებით პრობლემის უმტკივნეულოდ მოგვარება.

ამის გარდა კიდევ იყო დაგეგმილი 2 მნიშვნელოვანი რეფორმა ამ მიმართულებით, მაგრამ ამაზე ცოტა მოგვიანებით... „, - აცხადებს შაშკინი.