„ჩვენ არ მივიღებთ არცერთ სიტყვას ადამიანისგან, ვინც არის ბრალდებული და რომლის მმართველობის დროსაც დაირღვა ქვეყნის მთლიანობა“, - ასე უპასუხა დღეს პრემიერმინისტრმა, ირაკლი ღარიბაშვილმა საქართველოს ყოფილ პრეზიდენტს მიხეილ სააკაშვილს.

„დღეს მე მოვისმინე ყოფილი პრეზიდენტის, სააკაშვილის განცხადება, იმასთან დაკავშირებით, რომ თურმე საქართველოს ხელისუფლებამ საფრთხის ქვეშ დააყენა ჩვენი ძმების, აფხაზების ბედი. მე მსურს შევახსენო ყველას, რომ ჩვენ არასოდეს არ მივიღებთ იმ ადამიანისგან არცერთ სიტყვას, რომელიც არის ბრალდებული უამრავ დანაშაულში. ადამიანი, რომლის პირობებშიც, რომლის რეჟიმის დროსაც ხდებოდა სისტემურად ადამიანების წამება, არაადამიანური მოპყრობა და რომლის დროსაც ჩვენი ქვეყნის მთლიანობა დაირღვა.

ჩვენმა საქართველომ სწორედ სააკაშვილის დროს დაკარგა კოდორი. სწორედ მისი გაუაზრებელი პოლიტიკის შედეგად მოხდა აფხაზეთისა და ოსეთის რუსეთის მიერ აღიარება. სწორედ მისი გაუაზრებელი პოლიტიკის შედეგია ის, რომ დღეს 20 პროცენტი ჩვენი ტერიტორიის არის ოკუპირებული რუსეთის მიერ. დღეს ეს ადამიანი გამოდის და ჭკუას გვასწავლის.

ადამიანი, რომლის დროსაც ციხეებში, მისი მეთვალყურეობის დროს, ხდებოდა წამება, გაუპატიურება და მკვლელობა. რომლის დროსაც ბიზნესი არ იყო თავისუფალი. ადამიანი თავისუფლად ვერ სუნთქავდა. დღეს ეს ადამიანი გამოდის და გვეუბნება, რომ სიტყვა, რომელიც ჩვენ ვიხმარეთ ეგრეთ წოდებული და ბრჭყალებში ჩასმული, თურმე საფრთხეს უქმნის ჩვენს სახელმწიფოებრიობას.

არცერთ შემთხვევაში, ჩვენ ვართ ის ხელისუფლება, რომელიც არის ხალხზე და სახელმწიფოზე ორიენტირებული“, - განაცხადა ირაკლი ღარიბაშვილმა.