საქართველოს პატრიარქი კვიპროსში გაემგზავრა

პოლიტიკა - 12:18, 17 Oct, 2014

1910

საქართველოს კათოლიკოს- პატრიარქი, ილია მეორე კვიპროსში გაემგზავრა. უწმინდესის
დელეგაცია, კვიპროსის მართლმადიდებელი ეკლესიის მთავარეპისკოპოსის, ქრიზოსტომოს II-ის მიწვევით გაემგზავრა. როგორც ცნობილია ვიზიტი მნიშვნელოვან შეხვედრებს მოიცავს.
პროტოპროსვიტერ გიორგი ზვიადაძის თქმით, უწმინდესი დღეს ლარნაკას აეროპორტში ჩაბრძანდება, სადაც მედიის წარმომადგენლებს შეხვდება. ხვალ დაგეგმილია საქარტველოს პატრიარქის შეხვედრა კვიპროსის ეკლესიის მეთაურთან, უნეტარეს ქრიზოსტომოს II-სთან. შემდეგ კი საქართველოს კათოლიკოს-პატრიარქისპატივსაცემად გაიმართება ოფიციალური სადილი, რომელსაც კვიპროსის პრეზიდენტი, საგარეო საქმეთა მინისტრი და განათლებისა და კულტურის მინისტრიც დაესწრებიან. ხვალვე დაგეგმილია კათოლიკოს-პატრიარქის ექსკლუზიური ინტერვიუ ტელეკომპანია "მეგასთან" ბიზანტიის მუზეუმში.

გიორგი ზვიადაძის განცხადებით, 19 ოქტომბერი წმინდა ლაზარეს წმინდა ნაწილების ამობრძანების დღეა და ამასთან დაკავშირებით ლარნაკას წმინდა ლაზარე ტაძარში ერთობლივი წირვა გაიმართება, რომელშიც ილია მეორე, საქართველოს დელეგაციის მღვდელმთავრები და სასულიერო პირები მიიღებენ მონაწილეობას. 20 ოქტომბერს დაგეგმილია კიკოსის ღვთისმშობლის სახელობის მონასტრის მოლოცვა. ილია მეორე იქ პარაკლისს გადაიხდის, პატივს მიაგებს არქიეპისკოპოსს მაკარიუსის ხსოვნას და მის საფლავს ეწვევა, ის კვიპროსის მართლმადიდებელი ეკლესიის წინამძღოლი იყო.

21 ოქტომბერს დაგეგმილია სრულიად საქართველოს კათოლიკოს-პატრიარქის და დელეგაციის წევრების სტუმრობა ღალიის ქართულ სამონასტრო კომპლექსში. ილია მეორე იქ აღსრულებული სასულიერო პირებისა და ქტიტორების სულის მოსახსენიებლად პანაშვიდს გადაიხდის, ასევე შესრულდება პარაკლისი.