იუსტიციის მინისტრმა საქართველოსა და ევროკავშირს შორის ვიზების ლიბერალიზაციის საკითხი, საშინაო პოლიტიკის საქმეებში, ევროკომისარ - სესილია მალსტრომთან გამართულ შეხვედრაზე განიხილა. თეა წულუკიანი სამუშაო ვიზიტით ბრიუსელში იმყოფება.

მინისტრის განმარტებით, უვიზო მიმოსვლის შესახებ სამოქმედო გეგმის პირველი, მოსამზადებელი ეტაპი რამდენიმე კვირაში დასრულდება, რის შემდეგაც ქვეყანა დოკუმენტის მომდევნო ეტაპზე, უშუალოდ განხორციელების ფაზაზე გადავა.

„სესილია მალსტრომთან ჩვენ გავიარეთ ბოლო საკითხები, რომელიც უნდა შეეხოს ვიზა ლიბერალიზაციის სამოქმედო გეგმის პირველი ფაზის წარმატებით დახურვას. ძალიან მალე, რამდენიმე კვირაში ჩვენ შევძლებთ პირველი ფაზა წარმატებით დავხუროთ და გადავიდეთ იმპლემენტაციის შემდეგ ეტაპზე, რაც დროსთან ერთად საქართველოს მისცემს საშუალებას გახსნას საზღვრები ევროკავშირის ქვეყნებთან“, - განაცხადა იუსტიციის მინისტრმა.