„აბაშიძე-კარასინის შეხვედრების ფორმატისგან განსხვავებით ჟენევის მოლაპარაკებები უფრო მნიშვნელოვანი ტრიბუნაა“, - ამის შესახებ არასამთავრობო ორგანიზაცია „საქართველოს რეფორმების ასოციაციის“ დირექტორმა სერგი კაპანაძემ განაცხადა.

მისი თქმით, საქართველომ უფრო აქტიურად ჟენევის მოლაპარაკებები უნდა გამოიყენოს, რადგან ამ ფორმატში რუსეთთან და ოკუპირებული რეგიონების წარმომადგენლებთან ერთად საერთაშორისო თანამეგობრობა მონაწილეობს და უფრო მეტიც, ჟენევის მოლაპარაკებებს მოდერაციას საერთაშორისო ორგანიზაციების წარმომადგენლები უწევენ. მისივე თქმით, კარასინი-აბაშიძის შეხვედრაში საქართველო მოლაპარაკებებს რუსეთის პირისპირ მარტო აწარმოებს .

კაპანაძეს არ უკვირს, რომ კარასინი-აბაშიძის შეხვედრების ფარგლებში კონკრეტულ შედეგებს ვერ მიაღწიეს.

„ის, რომ ამ ფორმატში არ იქნა კონკრეტული შედეგები მიღწეული, ძირითადად არის განპირობებული იმით, რომ რუსეთი არ არის დაინტერესებული და არ აქვს პოლიტიკური ნება“, - განაცხადა კაპანაძემ „კურიერთან“ საუბრისას.