რუსეთის საგარეო საქმეთა მინისტრის მოადგილე გრიგორი კარასინი აცხადებს, რომ კონკრეტული ხელშეკრულებით, აფხაზეთის სუვერენიტეტს საფრთხე არ ემუქრება. სიტყვა ანექსია კი რუსული მხარისათვის მიუღებელია .

ეს განცხადება კარასინმა პრაღაში საქართველოს პრემიერ-მინისტრის ოფიციალურ წარმომადგენელთან, ზურაბ აბაშიძესთან შეხვედრის შემდეგ გააკეთა.

„მკაცრი ფორმით დასვა შეკითხვა ჩემმა ქართველმა კოლეგამ შეხვედრაზე რუსეთ–აფხაზეთის შეთანხმების პროექტთან დაკავშირებით. თუმცა ეს საკითხი ჩვენი მოლაპარაკების მანდატში არ შედიოდა. მოვუსმინე მის ლოგიკას და სათანადოდ ავუხსენი ჩვენი პოზიციაც. აფხაზეთის საპრეზიდენტო არჩევნების შემდეგ, ახალი ხელისუფლება დაინტერესებულია, რომ გავაფორმოთ ახალი შეთანხმება. ეს არანაირად არ ლახავს დამოუკიდებელი აფხაზეთის სტატუსს და სუვერენიტეტს. ის მიზნად ისახავს, რუსეთთან სამოკავშირეო ურთიერთობის გამარტივებას და ინტეგრაციას ყველა სფეროში, მათ შორის თავდაცვის სფეროშიც. ასე რომ ჩვენი ურთიერთობების განვითარების ეს ეტაპი არანაირად არ ნიშნავს აფხაზეთის სტატუსისთვის საფრთხის შექმნას, მითუმეტეს მის ანექსიას. ჩვენი ურთიერთობა აფხაზეთთან და სამხრეთ ოსეთთან პრინციპულად არ ექვემდებარება გადახედვას. ჩვენ ორივე ვაღიარეთ და განვავითარებთ მათთან ურთიერთობას“, - განაცხადა კარასინმა.

მან არ უპასუხა ქართველი ჟურნალისტების მიერ დასმულ შეკითხვას, მოაწერს თუ - არა რუსეთი ხელს დე-ფაქტო აფხაზეთთან სამხედრო გაერთიანების შესახებ ხელშეკრულებას.