“კეიტოს“ ინსტიტუტში სიტყვით გამოსვლის შემდეგ, საქართველოს ყოფილმა პრეზიდენტმა აუდიტორიის კითხვებსაც უპასუხა, სიტყვა ითხოვა საქართველოს ელჩმა აშშ-ში არჩილ გეგეშიძემაც.

„ველოდი თქვენგან უფრო სრული სურათის აღწერას, რა მოხდა და რა ხდება საქართველოში და მის ირგვლივ, სამწუხაროდ, თქვენს გამოსვლაში დავინახე წარსულის და აწმყოს დამახინჯებული სურათი.

რა თქმა უნდა, 2003 წლის შემდეგ ტრანსფორმაციამ საქართველოს ცვლილებები მოუტანა, მაგრამ აღმოსავლური ბრძნული გამონათქვამის მიხედვით, „ყველაფერი რაც ბრწყინავს, ოქრო არ არის“

ველოდი თქვენგან იმის ახსნას, რატომ უნდა მიეცა ხალხს ხმა თქვენს წინააღმდეგ. თქვენ თქვით, რომ ეს მოხდა ფეოდალური მენტალიტეტის გამო, რომ ქართველებისთვის ეს ნაცნობია და წარსულზე ორიენტირებული ადამიანები ვერ იგებენ რა არის პროგრესი, მაგრამ რეალურად ჩვენ ვნახეთ ისეთი მმართველობა რომელიც ქართველი ხალხისთვის მიუღებელი იყო“- განუცხადა არჩილ გეგეშიძემ მიხეილ სააკაშვილს.

ელჩის რეპლიკას ყოფილი პრეზიდენტის პასუხიც მოყვა:

„გიპასუხებთ სინგაპურის ყოფილი ლიდერის სიტყვებით, ის თავის წიგნში ამბობს რომ ნებისმიერ წარმატებულ მთავრობას ხალხი მაქსიმუმ 10 წელწადში გადაირჩევს, თავისუფალი არჩევნების გზით, რადგან ხალხს ცვლილება უნდა.რა თქმა უნდა არჩევნები საფასურს მოითხოვს.

როდესაც ვსაუბრობ ფეოდალურ მენტალიტეტზე , ვგულისხმობ კორუმპირებულ ელიტას, რომელიც ჩემი ქვეყნის სადავეებთან დაბრუნდა, მე ვამაყობ იმ რეფორმებით რომელიც გავატარეთ, იმ შენობებით, რომლებიც ავაშენეთ.

ბატონო ელჩო, თქვენი მდგომარეობის ნამდვილად არ მშურს, აქ არიან ყოფილი ელჩები , რომლებსაც თავისუფლად შეუძლიათ აზრის გამოხატვა და ამას გისურვებთ თქვენც. თქვენ თქვით, რომ რაც ბრწყინავს, ყველაფერი ოქრო არ არის, მაგრამ არსებობს მეორე გამოთქმაც ,შეიძლება ოქრო არ იყო რაც ბრწყინავდა, მაგრამ ხომ ბრწყინავდა?! ხალხი ფიქრობს რომ ქვეყანა არასწორი მიმართულებით მიდის“- აღნიშნა სააკაშვილმა.