„დააბრალეთ ივანიშვილს რაც გინდათ, გარდა მტრულად განწყობილი ქვეყნის სამსახურისა“, - ამ შინაარსის სტატია „ნიუ იორკ ტაიმსში“ გამოქვეყნდა. წერილში, სათაურით „სააკაშვილს დევნის საკუთარი წარსული, არა პუტინთან შეკრული ივანიშვილი“, - საუბარია იმაზე, რაც ყოფილი პრემიერის მისამართით ქვეყნის შიგნით და გარეთ ისმის.

საქართველოს პარლამენტის თავმჯდომარე სტატიას მიხეილ სააკაშვილის საქმით იწყებს და ამბობს, რომ ეჭვები, რომლებიც საქართველოს მეგობრებს ამ კუთხით უჩნდებათ, უსაფუძვლოა.

უსუფაშვილის აზრით, ყველაზე არასერიოზული ის იყო, რომ ბიძინა ივანიშვილს რუსეთის სასარგებლოდ მუშაობასა და რუსეთის ორბიტაზე, საქართველოს დაბრუნების მცდელობაში ადანაშაულებენ.

„რა არის რუსეთი ბიძინა ივანიშვილისთვის? ეს არის ქვეყანა, სადაც ის მუშაობდა სამეცნიერო დისერტაციაზე. დააგროვა თავისი კაპიტალის დიდი ნაწილი და დატოვა იგი. ივანიშვილმა პრეზიდენტ ელცინის მმართველობის დასრულებისთანავე დატოვა რუსეთი და 12 წელია იქ აღარ ჩასულა. ივანიშვილი „გაზპრომის“ ბოლო აქციას და პრეზიდენტ სააკაშვილთან საქმიან ურთიერთობებს ერთდროულად, 7 წლის წინ გამოემშვიდობა, ხოლო რუსეთში დარჩენილი ყველა სხვა ქონება მან გაასხვისა პოლიტიკური აქტიურობის დაწყებისთანავე. რუსეთი ივანიშვილის წარსულს განეკუთვნება. მე თუ მკითხავთ, ივანიშვილის პოლიტიკურ სცენაზე გამოსვლა და პრეზიდენტ სააკაშვილის გეგმების არევა თავად სააკაშვილთან ერთად სწორედ პრეზიდენტ პუტინის გეგმებში არ შედიოდა ყველაზე მეტად.

დემოკრატიული განვითარების გზიდან გადასული და ხალხის ჭეშმარიტი მხარდაჭერის არ მქონე საქართველოს ხელისუფლება, რომლის უავტორიტეტო, მაგრამ ჯერკიდევ საჭირო მეთაურს დემოკრატიული სამყაროს ლიდერები აღარც კი ხვდებიან - აი, ჭეშმარიტი რუსული ოცნება, რომელიც აუცილებლად ახდებოდა, რომ არა ივანიშვილი.

იგი ყევლაფერს თავისი ქვეყნის ევროპული არჩევანის განმტკიცებისთვის აკეთებს. ამიტომ, დააბრალეთ რაც გინდათ, გარდა მტრულად განწყობილი ქვეყნის სამსახურისა“, - აცხადებს უსუფაშვილი.