საქართველოს ექსპრეზიდენტი მიხეილ სააკაშვილი ალექსანდრე მაშკევიჩს პოსტსაბჭოთა ოლიგარქს უწოდებს.

ისრაელში მოღვაწე ბიზნესმენი, რომელიც საქართველოში ფარმაცევტული ბიზნესით ინტერესდება, სააკაშვილმა ვაშინგტონში გამართულ შეხვედრაზე ამ სიტყვებით მოიხსენია.

მიხეილ სააკაშვილი ირწმუნება, რომ მაშკევიჩი მისი პრეზიდენტობის დასაწყისში საქართველოს ეკონომიკის ერთ-ერთი მიმართულების მონოპოლიას ითხოვდა, რაზეც უარი მიიღო, ახლა კი მას გზა გაუხსნეს.

ამ თემაზე მიხეილ სააკაშვილმა "კატოს" პოლიტიკური კვლევის ინსტიტუტში საერთაშორისო კონფერენციაზე ილაპარაკა.

შეხვედრა პოსტკომუნისტური ქვეყნების განვითარების გამოცდილებას მიეძღვნა. ექსპრეზიდენტმა აქცენტი იმ წარმატებებზე გააკეთა, რომელსაც საქართველომ ბოლო წლებში მიაღწია.

ვაშინგტონის შეხვედრის ტრანსლირება თბილისში საპრეზიდენტო ბიბლიოთეკაში ხდებოდა, რომელსაც სტუდენტები ესწრებოდნენ.

ალექსანდრე მაშკევიჩი საქართველოს ყოფილი პრემიერ-მინისტრის ბიძინა ივანიშვილის მეგობარია. ბიზნესმენი საქართველოში რამდენიმე დღის წინ ჩამოვიდა და ხელისუფლების წარმომადგენლებთან უკვე გამართა არაფორმალური შეხვედრები. მთავრობის წევრები შეხვედრის დეტალებს არ ახმაურებენ.