საგარეო საქმეთა მინისტრის მოადგილე, დავით ზალკალიანი ზურაბ აბაშიძის გადაწყვეტილებას, მოლაპარაკებებში მონაწილეობის მიღების შესახებ, დადებითად აფასებს და აცხადებს, რომ პრაღაში გამგზავრებაზე უარის თქმა, კიდევ უფრო მეტ დაძაბულობას გამოიწვევდა.

ზალკალიანის განცხადებით, რუსულ მხარესთან შეხვედრაზე უარის თქმას, შესაძლოა, კიდევ უფრო დაეჩქარებინა ე.წ. შეთანხმება აფხაზებსა და რუსებს შორის ერთობლივი საჯარისო ნაწილების ფორმირებასთან დაკავშირებით.

მინისტრის მოადგილე მიაჩნევს, რომ სწორედ არსებულ ფორმატში უნდა გააპროტესტოს ქვეყანამ ხელშეკრულება და დიალოგის ფორმით გაანეიტრალოს სიტუაცია.

მისივე თქმით, უნდა მოხდეს საერთაშორისო საზოგადოების ინფორმირება და, რაც შეიძლება მეტი, ზეწოლა რუსეთზე.

საგარეო საქმეთა მინისტრის მოადგილის პოზიციას იზიარებს პაატა ზაქარეიშვილიც და აცხადებს, რომ რუსეთთან დიალოგის გაწყვეტა არ უნდა მოხდეს, რადგან პრაღაში გამართულ შეხვედრებზე ქვეყნისთვის მნიშვნელოვანი საკითხების გადაწყვეტა ხდება.