ოპოზიცია კარასინი-აბაშიძის მოლაპარაკებების ფორმატს ქვეყნისთვის დამაზიანებელს უწოდებს და ხელისუფლებას მისი გაუქმებისკენ მოუწოდებს. "ნაციონალური მოძრაობა" პარლამენტის მიერ საგანგებო რეზოლუციის მიღებასაც ითხოვს.

ამის შესახებ მათ პირველი განცხადდბები გუშინვე გააკეთეს და გუშინვე დაიწყო რეზოლუციის ტექსტზე მუშაობა. ტექსტის შინაარსი დღეს უკვე ცნობილი გახდება და რუსეთსა და აფხაზეთს შორის მოკავშირეობისა და ინტეგრაციის შესახებ შეთანხმებასთან დაკავშირებული რეზოლუციის პროექტს ოპოზიცია პარლამენტს დასამტკიცებლად წარუდგენს.

„ნაციონალური მოძრაობის“ წევრები აცხადებენ, რომ ეს დოკუმეტი რუსეთის მიერ აფხაზეთის იურიდიული ანექსიის რეალური საფრთხის დადასტურებაა, რომლის წინააღმდეგაც პარლამენტმა და ხელისუფლებამ მკაფიო პოზიცია უნდა შეიმუშაოს.

„ერთობლივი არმიის შექმნა, ერთობლივი შინაგან საქმეთა სამინისტროს შექმნა და ე.წ. რუსეთ-აფხაზეთის საზღვრის გაუქმება ნიშნავს იმას, რომ ის დანაშაულებრივი პოლიტიკა, რომელსაც რუსეთი აწარმოებს საქართველოს მიმართ, დასკვნით ფაზაში შედის და ფაქტიურად და იურიდიულად უკვე ანექსია ხდება. ჩვენ ძალიან პრინციპულად ვითხოვთ, რომ ის პოლიტიკა, რომელსაც აწარმოებს საქართველოს ხელისუფლება გადაიხედოს,“ - განაცხადა გოკა გაბაშვილმა.