საქართველოს პრეზიდენტი რუსეთსა და აფხაზეთს შორის ახალი სამხედრო ხელშეკრულების გაფორმებას ქვეყნის სუვერენიტეტისა და რეგიონის უსაფრთხოებისთვის საფრთხედ მიიჩნევს და საერთაშორისო საზოგადოებას რეაგირებისკენ მოუწოდებს. ამის შესახებ განცხადება მარგველაშვილმა დღეს საგანგებოდ გამართულ ბრიფინგზე გააკეთა, სადაც იმ საფრთხეზე ილაპარაკა, რაც ამ დოკუმენტის მიღების შემდეგ ჩნდება.

„ასეთი შინაარსის ხელშეკრულების გაფორმება გააუარესებს შავი ზღვის აუზის და კავკასიის რეგიონის უსაფრთხოებას, მისი გაფორმება ეწინააღმდეგება ჟენევის კონსულტაციების ფორმატს და სულისკვეთებას, ეს ხელშეკრულება საფრთხეს უქმნის უშუალოდ ჩვენი ქვეყნის თავდაცვისუნარიანობას.

ხელშეკრულების ამოქმედების შემთხვევაში გაუარესდება რეგიონში ჰუმანიტარული და ადამიანების უფლებათა დაცვის საკითხები. რეალური საფრთხის წინაშე დადგება აფხაზობის, როგორც ქართული სახელმწიფოებრიობის განუყოფელი ნაწილის თვითდამკვიდრება და იდენტობის მომავალი.“-აღნიშნა მარგველაშვილმა

პრეზიდენტი პარლამენტს მიმართავს, რომ "უსწრაფეს ვადაში განიხილონ საქმის ვითარება და შეიმუშაონ პოზიცია," რის საფუძველზეც მოიწვევს უშიშროების საბჭოს სხდომას და იმსჯელებენ გასატარებელ ღონისძიებებზე:

„გამომდინარე იქიდან რომ საქართველოში საშინაო და საგარეო პოლიტიკის განმსაზღვრელი ორგანო არის საქართველოს პარლამენტი, მივმართავ პარლამენტს უსწრაფეს ვადაში განიხილონ საქმის ვითარება და შეიმუშაონ პოზიცია, ამ პოზიციაზე დაფუძნებით მოვიწვევთ უშიშროების საბჭოს სხდომას და დავგეგმავთ შემდეგ ნაბიჯებს ვითარების დასტაბილურებასთან დაკავშირებით.მივმართავ საერთაშორისო თანამეგობრობას , მეგობარ ქვეყნებს ,უსწრაფესად ადეკვატურად შეაფასონ ვითარება და მისცენ შესაბამისი რეაქცია ჩვენი ქვეყყნის სუვერენიტეტის და დამოუკიდებლობის წინააღმდეგ ამ კიდევ ერთ გადადგმულ ნაბიჯს.“ -განაცხედა პრეზიდენტმა.

პრეზიდენტის მიმართვა პარლამენტს და საერთაშორისო საზოგადოებას უკვე გადაეგზავნა.