თბილისის მერი დავით ნარმანია ევროსაბჭოს ადგილობრივ და რეგიონულ ხელისუფლებათა კონგრესის მიერ მიღებულ რეზოლუციას პოზიტიურად აფასებს. მისი თქმით, დოკუმენტში ზუსტად არის ასახული ის პოზიტიური შეფასებები, რაც თვითმმართველობის არჩევნებზე სადამკვირვებლო მისიის მხრიდან გაკეთდა.

თბილისის მერის თქმით, არჩევნები უპრეცედენტოდ გამჭვირვალედ და კონკურენტულ გარემოში გაიმართა, რაც კონგრესის მიერ მიღებულ დოკუმენტშიც აისახა. ის ასევე განმარტავს, რომ რეზოლუცია "საქართველოს გამარჯვებაა და ადგილობრივი თვითმმართველობის რეფორმა ისევე უნდა გაგრძელდეს, როგორც აქამდე მიმდინარეობდა".

კომენტარი რეზოლუციასთან დაკავშირებით ნარმანიამ სტრასბურგში, ევროსაბჭოს ადგილობრივ და რეგიონულ ხელისუფლებათა კონგრესის მიერ საქართველოში ადგილობრივი თვითმმართველობის არჩევნებზე რეზოლუციის დამტკიცების შემდეგ გააკეთა.