შინაგან საქმეთა მინისტრის მოადგილე ლევან იზორია აცხადებს, რომ იოსებ გიორხელიძის გატაცების ფაქტი უკვე გახსნილია, დაკავებულია რამდენიმე პიროვნება და შესაბამისად, კომისიის შექმნის აუცილებლობა არ არსებობს.

ლევან იზორია უპასუხისმგებლოს უწოდებს "ნაციონალური მოძრაობის" წევრების იმ განცხადებას, რომლის თანახმად, გატაცების შემთხვევა ხელისუფლების კრიმინალებთან დარიგების შედეგია.

"კომისიის შექმნის ვერანაირ საფუძველს ვერ ვხედავ. ამ შემთხვევაში ეს კონკრეტული დანაშაული გახსნილია. ბრალდებულების ვინაობა დადგენილია. ამ მოთხოვნის ავტორები არიან ადამიანები, რომლებიც ამბობენ, რომ თურმე ხელისუფლების კრიმინალთან გარიგების შედეგია ეს ფაქტი. ეს ყველა იმ პოლიციელის შეურაცხყოფაა, რომელიც დღე და ღამეს ათენებს, რომ კრიმინალს ებრძოლოს. ასეთი უპასუხისმგებლო განცხადებების ავტორებს რა პოლიტიკური მიზნისთვის სჭირდებათ საპარლამენტო კომისიების შექმნა მაყურებლებისთვის მიმინდია",-განაცხადა იზორიამ ტელეკომპანია "იმედის" ეთერში „ქრონიკაში“ ჩართვისას.

ლევან იზორია, პრემიერ-მინისტრის განცხადებასაც გამოეხმაურა და აღნიშნა, რომ ღარიბაშვილმა დანაშაულთან დაკავშირებით მხოლოდ თავისი ვარაუდი გამოთქვა.

"ბუნებრივია, მე ამ განცხადებებში ვერაფერს საგანგაშოს ვერ ვხედავ. ეს ნამდვილად არ არის პირდაპირი ბრალდება, ის ამბობს თავის მოსაზრებას, რომ ხელწერა იკვეთება სწორედ ისეთი, რომელიც დამახასიათებელი იყო კუდ-ისთვის და სოდ-ისთვის. ამ შემთხვევაში გამოძიება გრძელდება, ამ გამოძიების ფარგლებში ვარკვევთ სხვა პირთა ვინაობასაც, რომლებსაც შესაძლოა, კავშირი ჰქონოდათ ამ დანაშაულთან",- განაცხადა ლევან იზორიამ.