თვითმმართველობის მეორე ტურის წინ თბილისის ყოფილი მერის, გიგი უგულავას დაკავებამ ქვეყანაში დაძაბულობა შექმნა, - ასე აფასებს ბოლო არჩევნებს ევროსაბჭოს რეგიონული კონგრესი და საქართველოს ხელისუფლებას მოუწოდებს, სასამართლოს დამოუკიდებლობა მაღალი სტანდარტებით იყოს დაცული.

საქართველოში გამართული თვითმართველობის არჩევნების შესახებ დღეს სტრასბურგში მსჯელობენ. მსჯელობის დაწყებამდე კი ევროსაბჭოს კონგრესმა მონიტორინგის ანგარიშის პირველადი ვერსია გამოაქვეყნა.

დოკუმენტში ჩატარებული არჩევნები პოზიტიურად არის შეფასებული. თუმცა, ამ შეფასების მიუხედავად, ევროსაბჭოს რეგიონული კონგრესი მიიჩნევს, რომ თვითმმართველობის მეორე ტურის წინ თბილისის ყოფილი მერის, გიგი უგულავას დაკავებამ ქვეყანაში დაძაბულობა შექმნა. ამასთან, ევროსაბჭო მოუწოდებს საქართველოს ხელისუფლებას, სასამართლოს დამოუკიდებლობა მაღალი სტანდარტებით იყოს დაცული.

ევროსაბჭოს რეგიონული კონგრესი საქართველოს ხელისუფლებას რეკომენდაციებითაც მიმართავს. მათ შორის საუბარია საარჩევნო კომისიაში პარტიათა თანაფარდობის, დამოუკიდებელი კანდიდატებისთვის მერის და გამგებლის პოსტზე კენჭისყრის უფლების მიცემასა და უწყებათშორისი კომისიის როლის გაძლიერების აუცილებლობის საკითხებზე.

მიმდინარე შეხვედრაზე კონგრესის წევრებს სიტყვით დავით ნარმანიაც მიმართავს. თბილისის მერი მონიტორინგის კომიტეტს ადგილობრივი თვითმმართველობის რეფორმის ანგარიშს და სამომავლო გეგმებს გააცნობს.