პარლამენტის საგარეო ურთიერთობათა კომიტეტის თავმჯდომარე კოლეგებს მოუწოდებს, უარი თქვან პრაღაში დაგეგმილ შეხვედრაში მონაწილეობაზე და მიზეზად "ახალ რეალობას " ასახელებს.

ეს განცხადება ბერნში მყოფმა თედო ჯაფარიძემ ჟურნალისტებთან გააკეთა, სადაც აფხაზეთსა და რუსეთს შორის ახალი ხელშეკრულების გაფორმებაზე გააკეთა კომენტარი და თქვა, რომ ამით "ახალი რეალობა იქმნება".

„რუსეთის მხარე უტიფრად აქვეყნებს გაურკვეველი შინაარსის დოკუმენტს , ცდილობს უკვე ღია ანექსიაზე გააკეთოს აქცენტი, მე ყოველ შემთხვევაში დავფიქრდებოდი, რამდენად შესაძლებელი და მისაღები იქნებოდა ჩვენთვის ამ რაუნდის ჩატარება, მე თავს შევიკავებდი.

მე არავისთან კონსულტაციები არ მქონია, ჩვენ ვიმყოფებით შვეიცარიაში, ეს არის ჩემი პირადი მოსაზრება, ჩემი განწყობა ამ ახალ რეალობასთან დაკავშირებით, მე მგონია რომ ეს რაუნდი არ უნდა ჩატარდეს",- განაცხადა ჯაფარიძემ.

შეგახსენებთ, რომ 16 ოქტომბერს პრაღაში დაგეგმილია აბაშიძე-კარასინის შეხვედრის მორიგი რაუნდი.