ბათუმის პორტში ამერიკული სამხედრო ხომალდი "Mount Whitney" იმყოფება

პოლიტიკა - 13:53, 14 Oct, 2014

2053

ბათუმის პორტში 5 დღიანი ვიზიტით ამერიკული სამხედრო ხომალდი „მაუნთ უიტნი“ (Mount Whitney) იმყოფება. მისი ეკიპაჟის წევრებთან ერთად დაგეგმილია ანტიტერორისტული და ხანძარსაწინააღმდეგო წვრთნები, რომლებშიც მონაწილეობას საქართველოს სანაპირო დაცვის სამსახურის და ქალაქ ბათუმის სამაშველო და სახანძრო სამსახურების თანამშრომლები მიიღებენ.
სამხედრო გემის ეკიპაჟის წევრებს შორისაა აშშ-ის სამხედრო-საზვაო ძალების ლეიტენანტი, თბილისში დაბადებული გივი ტიბანელი. 29 წლის ოფიცერმა ჟურნალისტებს უამბო, რომ საქართველოდან 10 წლის ასაკში გაემგზავრა და მას შემდეგ სან-ფრანცისკოში ცხოვრობდა. გივი ტიბანელი 4 წელია აშშ-ის სამხედრო-საზღვაო ძალებში მსახურობს.
„ვერც კი წარმოვიდგენდი, რომ ოდესმე საქართველოში ამერიკული ხომალდით ჩამოვიდოდი“, - განაცხადა გივი ტიბანელმა.
"მაუნთ უითნი აქ ჩვენი კავშირების გაძლიერებისა და მტკიცე პარტნიორობის მხარდასაჭერად იმყოფება. მოუთმენლად ველით ვიზიტის გაგრძელებას" - განაცხადა საზღვაო ხომალდის კაპიტანმა მარკ კოლომბომ.
აშშ-ის საელჩოს მიერ გავრცელებულ პრესრელიზში ნათქვამია, რომ „მაუნთ უიტნის“ ვიზიტი ადასტურებს ვაშინგტონის ძალისხმევას გააღრმაოს ურთიერთობა ნატოელ მოკავშირეებსა და საქართველოს მსგავს პარტნიორებთან შავი ზღვის რეგიონში მშვიდობისა და სტაბილურობის განმტკიცებისთვის.