საქართველოს საპარლამენტო დელეგაციის ოფიციალური ვიზიტი შვეიცარიაში გრძელდება.

დავით უსუფაშვილის ხელმძღვანელობით ქართველი დეპუტატები, ამჟამად, ბერნში ორდღიანი ვიზიტით იმყოფებიან.

დაგეგმილია საქართველოს პარლამეტის სპიკერის შეხვედრა ბერნის მერთან და ქვედა პალატის სპიკერთან. დავით უსუფაშვილმა შვეიცარიის, როგორც რუსეთ-საქართველოს შორის მედიატორის როლზე გაამახვილა ყურადღება.

„შვეიცარია სრულიად უნიკალური შესაძლებლობებით გამოირჩევა საეთაშორისო ასპარეზზე იმის გათვალისწინებით, რომ იგი არის ნეიტრალური ქვეყანა, არ არის ბევრი საერთაშორისო ორგანიზაციის წევრი, მაგრამ, ამავდროულად, არის ძალიან აქტიური მოთამაშე და შემთხვევითი არ არის, რომ სწორედ შვეიცარიამ იკისრა საქართველოსა და რუსეთს შორის შუამავლის როლი. სასიამოვნოა, რომ შვეიცარიის მთავრობა, მისი პოლიტიკური ელიტის წარმომადგენლები აქტიურად მონაწილეობენ საქართველოსთან დაკავშირებულ საქმეებში“, - განაცხადა გამართული შეხვედრების შემდეგ პარლამენტის თავმჯდომარემ.

შვეიცარიაში ვიზიტისას ქართულმა დელეგაციამ მონაწილეობა მიიღო ჟენევაში გამართულ საპარლამენტთაშორისო ასამბლეის 131-ე სესიაში.