ოკუპირებული აფხაზეთის ე.წ. პარლამენტმა რუსეთის ფედერაციასთან გაერთიანებული ჯარების დაჯგუფების შექმნის პროექტზე მუშაობა დაიწყო. დოკუმენტი რომელიც, სააგენტო "აფსნი პრესმა" სრულად გამოქვეყნა, რუსეთის შეიარაღებულ ძალებსა და აფხაზეთს შორის გაერთიანებული დაჯგუფების შექმნას გულისხმობს, რომელიც გაეროს წესდების 51 მუხლის შესაბამისი იქნება.

დოკუმენტში ნათქვამია, რომ თუ რომელიმე ქვეყანა სამხედრო აგრესიას განახორციელებს მოლაპარაკების ერთ-ერთ მხარეზე, ეს ავტომატურად ჩაითვლება აგრესიად შეთანხმების ორივე მხარის მიმართ.

ხელშეკრულება თავდაცვის საერთო ინფრასტრუქტურის შექმნასაც გულისხმობს. ამასთან, რუსეთი აიღებს ვალდებულებას, ხელი შეუწყოს აფხაზეთის საერთაშორისო კავშირების განვითარებას. ოკუპირებული აფხაზეთის ე.წ. პრეზიდენტის, რაულ ხაჯიმბას განმარტებით აღნიშნული დოკუმენტი რუსული მხარის მიერაა შემუშავებული.