ყოველთვის ვცდილობ სპორტის და პოლიტიკის გამიჯვნას

ყოველთვის ვცდილობ სპორტის და პოლიტიკის გამიჯვნას - პრემიერმინისტრი

პოლიტიკა - 18:06, 12 Oct, 2014

1623

გორში ამხანაგური მატჩი გაიმართა, რომელშიც საქართველოს მინისტრთა კაბინეტის წევრები მონაწილეობდნენ. მატჩი საქველმოქმედო იყო და მიზნად ისახავდა ქართულ-ოსური ურთიერთობების აღდგენისათვის ხელშეწყობას.

"საოცარი განწყობა მაქვს. ეს იყო ნაბიჯი იმისკენ, რომ ჩვენს შორის ნდობა აღდგეს. ძალიან მიხარია, რომ არის არის ჩვენი ოსი ძმების ასეთი ჯანსაღი თაობა. ძალიან კარგი განწყობა იყო, მე ვგრძნობდი სიყვარულს და მეგობრობას, რომელიც მოდიოდა მათგან. სწორედ ამიტომ გადავწყვიტე, მეორე ტაიმში გადავსულიყავი მათ მხარეს. ვფიქრობ, ძალიან კარგი, მეგობრული თამაში გამოვიდა. ყოველთვის ვცდილობ სპორტის და პოლიტიკის გამიჯვნას. ჩვენთვის ძალიან მტკივნეულია ის, რაც მოხდა ჩვენს შორის. ეს ყველაფერი ერთხელ და სამუდამოდ უნდა ჩავაბაროთ წარსულს. ჩვენ გვაქვს უნიკალური შანსი, დავიწყოთ ნდობის აღდგენა. ცხინვალის "ლიახვი" წარმატებულად ასპარეზობს მეორე ლიგაში და ჩვენ მათ მაქსიმალურად მხარს დავუჭერთ, რომ კიდევ უფრო წარმატებულები გახდნენ",- აღნიშნა პრემიერმა.

"თბილისისა" და ცხინვალის "ლიახვის" ამხანაგური მატჩი დღეს გორის სტადიონზე გაიმართა და ფრედ, ანგარიშით 4:4 დასრულდა. "თბილისის" შემადგენლობაში პრემიერ-მინისტრთან ერთად მინისტრთა კაბინეტის წევრები თამაშობდნენ. მეორე ტაიმში პრემიერმა ცხინვალის "ლიახვის" შემადგენლობაში ითამაშა, სამი გოლი გაიტანა და ანგარიში გაათანაბრა.

მატჩის დასასრულს გუნდებმა ერთობლივი სამახსოვრო ფოტო გადაიღეს.