თბილისის მერის მოადგილის, გუგა ხელაიას განცხადებით, თბილისის მერი დავით ნარმანია დანამატს არ იღებს და მხოლოდ სარგო ერიცხება.

„ზოგადად, ანაზღაურება შედგება სამი ნაწილისგან სარგო, დანამატი და პრემია. ჩვენი წინამორბედები, სევდია უგრეხელიძე, ირაკლი აბესაძე და სხვა ძმანი მათნი, სამივე კომპონენტს იღებდნენ. კონკრეტულად ხელფასი, სარგოსა და დანამატისგან შედგება, მაგრამ ისინი ყოველკვარტლურ პრემიებს იღებდნენ, რაც ორჯერ და სამჯერ აღემატებოდა სარგოს მოცულობას. სხვათა შორის, დავით ნარმანია დანამატს საერთოდ არ იღებს, მხოლოდ სარგო ერიცხება. ჩვენ კი, მისმა მოადგილეებმა, პრემიებზე უარი ვთქვით და სახელფასო დანამატის მოცულობაც შევიმცირეთ. არანაირი პრემია არ აგვიღია და არც ვაპირებთ აღებას. სხვა სიტყვებით რომ გითხრათ, მთლიან ხარჯში, რომელიც თბილისის მერის მოადგილეებისა და სამსახურის უფროსების ხელფასს ხმარდებოდა, ამიერიდან პრემიები გათვალისწინებული არ იქნება. „ნაციონალური მოძრაობის“ მთავრობამ საპრემიო ფონდი ისედაც ამოწურა, რადგან საარჩევნო პერიოდში, პირველი და მეორე ტურის დროს, მაქსიმალურად გასცეს პრემიები და ყოვლად დაუსაბუთებლად გაანაწილეს თანამშრომლებზე. პრემიის გაცემის არავითარი პრინციპი არ არსებობდა. ბევრს გასცემდნენ, რათა არჩევნების პერიოდში სასურველი შედეგი მიეღოთ და თანამშრომელთა გულიც მოეგოთ. ამის გამო სარგოს მოცულობის 100%-იანი ოდენობით, დასაბუთების გარეშე, ოთხი თვის მანძილზე გასცემდნენ პრემიებს. ხაზგასმით აღვნიშნავ, ჩვენი ხელისუფლების პირობებში თბილისის მერი, მოადგილეები და სამსახურების უფროსები პრემიებს არ აიღებენ, პრემია მხოლოდ იმ თანამშრომლებზე გაიცემა, რომლებიც სახელფასო დანამატს არ იღებენ, მაგრამ გარკვეულ წახალისებას საჭიროებენ. რაც შეეხება სახელფასო დანამატს, პირდაპირ უნდა გითხრათ, ამაში არავითარი უკანონობა არ არის. ჩვენთან მაღალკვალიფიციური ადამიანები მუშაობენ, რადგან 72 000 000-ლარიან ბიუჯეტს პროფესიონალებისგან შემდგარი გუნდის გაძღოლა სჭირდება და არა ისეთი ბაქია და პოლიტიკურად ანგაჟირებული ხალხი, როგორიც წინა მთავრობაში იყო! ოპონენტების კრიახი უსაფუძვლოა და ეს თემაც მათი შემოგდებულია, რათა თბილისის მთავრობას ხელი შეუშალონ!“ - განაცხადა გუგა ხელაიამ.

წყარო: გაზეთი "ვერსია"