ბიძინა ივანიშვილის ყოფილი მრჩეველი, გია ხუხაშვილი ჯანყარაშვილის პარტიულ თანამდებობაზე დანიშვნასთან დაკავშირებით ირაკლი ღარიბაშვილის გადაწყვეტილებას მიესალმება.

გია ხუხაშვილი აცხადებს, რომ ზვიად ჯანყარაშვილს ორი ამოცანა აქვს. მის გეგმებში შედის პარტიის მშენებლობა. მწყობრი იდეოლოგიის ჩამოყალიბება და ადამიანური რესურსის მოძებნა.

ხუხაშვილი მიიჩნევს, რომ პარტიის მექანიკური მშენებლობა არაფრის მომცემია იმ შემთხვევაში, თუ კვალიფიციური გუნდი არ ჩამოყალიბდა, რომელიც შესძლებს ოპონენტებს სრულფასოვანი ოპონირება გაუწიოს.

ხუხაშვილი აცხადებს, რომ „ქართული ოცნების“ ძირითადი ნაწილი არაკომპეტენტურია და პოლიტიკურ ბაზარზე საკუთარ თავს ვერ წარმოადგენს. „ალიასთან“ საუბრისას გია ხუხაშვილი აცხადებს, რომ მმართველ პარტიაში გარკვეული ცვლილებები მოხდება:

„მე ვფიქრობ, მოხდება ამ პარტიაში შემავალი ზოგიერთი პოლიტიკოსის უკანა პლანზე გადანაცვლება და ამ პოზიციებს დაიკავებენ ახალი სახეები , რომლებიც გარედან იქნებიან მოყვანილები. ეს პარტია ნულიდანაც არ იწყება. ზვიად ჯანყარაშვილს მოუწევს მინუსებიდან გადავიდეს პლიუსებში. „ქართული ოცნება“ ნდობის კრედიტს კარგავს და ამას სჭირდება დაბალანსება. ბატონი ზვიადის ამოცანა ძალიან სერიოზულია და ამავდროულად ძალიან მძიმე“- აცხადებს „ალიასთან“ საუბარში გია ხუხაშვილი.