2015 წლის ბიუჯეტის პროექტს დღეს პარლამენტის დიასპორისა და კავკასიის საკითხთა კომიტეტი განიხილავს. კომიტეტის თავმჯდომარეს, გუბაზ სანიკიძეს დიასპორის მიმართულებით გათვალისწინებულ მწირ დაფინანსებაზე აქვს პრეტენზიები. დოკუმენტის მიხედვით, დიასპორის საკითხებში სახელმწიფო მინისტრის აპარატისთვის განკუთვნილ თანხებს 2015 წელს მხოლოდ 10 000 ლარი ემატება.

სანიკიძის თქმით, ამჟამად წარმოდგენილ პროექტს ის მხარს დაუჭერს, თუმცა იმ შემთხვევაში, თუ 2016 წლის ბიუჯეტში თანხა არ გაიზრდება, იგი კომიტეტის თავმჯდომარეობაზე უარს იტყვის.

„უპრობლემოდ დავუჭერ მხარს 2015 წლის ბიუჯეტს, მაგრამ მომავალ წელს, როდესაც იქნება 2016 წლის ბიუჯეტის განხილვა, ძალიან მნიშვნელოვნად უნდა გავზარდოთ ამ მიმართულებით ხარჯები. სტრატეგია არის საბოლოოდ ჩამოსაყალიბებელი და აუცილებელია ეს გაკეთდეს. თუ მე ამაში ვერ დავარწმუნებ ჩემს თანამებრძოლებს, მაშინ გამოდის, რომ მე ვერ ვმუშაობ კარგად, შესაბამისად, ვერ ვხედავ აუცილებლობას, რომ გავაგრძელო კომიტეტის თავმჯდომარედ მუშაობა“, - განაცხადა სანიკიძემ.

კომიტეტის პრეტენზიებს პასუხობს ფინანსთა მინისტრის მოადგილე. გიორგი კაკაურიძე აცხადებს, რომ დაფინანსების გაზრდას ითხოვს თითქმის ყველა უწყება, ხოლო რაც შეეხება დიასპორის საკითხებში სახელმწიფო მინისტრის აპარატს, მისი დაფინანსება 950 000-დან 1 მილიონ ლარამდე გაიზარდა და ამასთან, ამ უწყების მიერ განხორციელებული ღონისძიებები მთავრობის სარეზერვო ფონდიდან ფინანსდება.