სახალხო დამცველის აპარატი სასჯელაღსრულების სისტემაში არსებულ ვითარებას „საგანგაშოს“ უწოდებს და აცხადებს, რომ პატიმართა სიცოცხლის, ჯანმრთელობისა და უსაფრთხოების დაცვის კუთხით უწყებაში სერიოზული პრობლემებია.

სახალხო დამცველის მოადგილე, პაატა ბელთაძე ამბობს, რომ ამ ვითარების გათვალისწინებით, უნდა გადაიხედოს ციხეების მართვის პრაქტიკა და შეიქმნას პატიმართა უსაფრთხოების გარანტიები.

„სამი, დროში ძალიან მიყოლებული შემთხვევა, მართლაც საგანგაშოდ იქნა შეფასებული სახალხო დამცველის მიერ და ხაზგასმული იქნა, რომ აუცილებელია დამატებით ახალი სისტემის, ახალი მიდგომის შემუშავება, რათა მინიმუმამდე შემცირდეს ასეთი ფაქტები, სისტემა უნდა გადავიდეს დინამიური უსაფრთხოების კონცეპციის დანერგვაზე, რაც გულისხმობს სასჯელაღსრულების დაწესებულებაში მოთავსებული თითოეული პირის დაკვირვებას და მაქსიმალური საფრთხოების გარანტიების შექმნას”, - აცხადებს ბელთაძე.