საქართველოს პრეზიდენტსა და ჟურნალისტებს შორის პრეზიდენტის რეზიდენციაში შეხვედრა შედგა. გიორგი მარგველაშვილსა და მედიის წარმომადგენლებს შორის გაცნობითი ხასიათის შეხვედრა 2 საათს გაგრძელდა.

დახურული შეხვედრა კითხვა-პასუხის რეჟიმში მიმდინარეობდა. საუბრის ძირითადი თემა ქვეყანაში არსებულ ვითარებას შეეხებოდა. როგორც შეხვედრის დასრულების შემდეგ გადაცემა „არჩევანის“ წამყვანმა გიორგი გაბუნიამ განაცხადა, მათ პრეზიდენტს ის პრობლემები გააცნეს, რომელიც დღეს მედიაში დგას.

„ძირითადად საუბარი იყო იმაზე, თუ რა პრობლემები შეიძლება მედიას მომავალში შეექმნას, ან რა პრობლემების წინაშე დგას დღეს მედია. თავისთავად, შეხვედრას და პრეზიდენტის ინიციატივას მე და ჩემი კოლეგები მივესალმებით, ვინაიდან ჩვენ უშუალოდ ვისაუბრეთ იმ საფრთხეებზე, რომელიც შეიძლება შეექმნას მედია. პრეზიდენტმა მზადყოფნა გამოთქვა, რომ თუ რომელიმე კონკრეტულ მედიასაშუალებას რაიმე კონკრეტული პრობლემა დაუდგება, ის მზად არის დადგეს ჩვენს გვერდით და მოაგვაროს ეს პრობლემა“, - აცხადებს „რუსთავი 2“-ის გადაცემა „არჩევანის“ წამყვანი გიორგი გაბუნია.