თბილისის მერი დავით ნარმანია მოსახლეობას ივერიის ყოვლადწმინდა ღვთისმშობლის ხატის ასლის საქართველოში ჩამობრძანების 25 წლისთავს ულოცავს.

„მინდა დღევანდელი დღე მივულოცო მათ, ვინც მახათას მთაზე, ივერიის ყოვლადწმინდა ღვთისმშობლის სახელობის ტაძრის მშენებლობაშია ჩართული. ტაძრის მშენებლობაში მთავარი თითოეული ადამიანის მონაწილეობაა, სწორედ ამიტომ, მშენებლობა სწრაფად და ხარისხიანად მიმდინარეობს“ - განაცხადა დავით ნარმანიამ. მისივე თქმით, თბილისის მერიამ დღევანდელი დღისთვის უფასო ავტობუსები გამოყო, რათა მსურველებს მახათას მთაზე მშენებარე ტაძარში მისვლა შეძლებოდათ.

ივერიის ყოვლადწმინდა ღვთისმშობლის ხატის ასლის საქართველოში ჩამობრძანების 25 წლისთავთან დაკავშირებით, სრულიად საქართველოს კათოლიკოს-პატრიარქმა, ილია II-მ მახათას მთაზე, ივერიის ყოვლადწმინდა ღვთისმშობლის ხატის სახელობის მშენებარე ტაძარში პარაკლისი გადაიხადა. ივერიის ღვთისმშობლის ხატი მახათას მთაზე სპეციალურად დღევანდელი დღისთვის სიონიდან მიაბრძანეს.

პარაკლისს პრემიერ-მინისტრი ირაკლი ღარიბაშვილი, შინაგან საქმეთა მინისტრი ალექსანდრე ჭიკაიძე, თბილისის ვიცე-მერი ალექსანდრე მარგიშვილი და საკრებულოს თავმჯდომარე გიორგი ალიბეგაშვილი დაესწრნენ.