უნდა შეწყდეს რუსეთთან ურთიერთობის დალაგებაზე ბრიყვული საუბრები

უნდა შეწყდეს რუსეთთან ურთიერთობის დალაგებაზე ბრიყვული საუბრები - გიგა ბოკერია

პოლიტიკა - 16:14, 09 Oct, 2014

2681

,,ნაციონალური მოძრაობის“ ლიდერი მიიჩნევს, რომ საქართველოს გაძლიერებისთვის პრინციპულია ამ ნაბიჯის გადადგმა. ბოკერია რუსეთთან ურთიერთობების დალაგებას საქართველოს ხელისუფლების მხრიდან ,,ბრიყვულ საუბარს“ უწოდებს, რომელიც მისი თქმით, ქვეყანას აზიანებს.

,,რუსეთის ფედერაცია ებრძვის ქართულ სახელმწიფოებრიობას, ჩვენს მომავალს და სწორედ ამიტომ აწუხებს ნებისმიერი ნაბიჯი, რომელმაც საქართველო შეიძლება გააძლიეროს და ამიტომ, პრინციპულია, რომ ეს ნაბიჯი იქნას გადადგმული, ეს ერთი და მეორე - უნდა შეწყდეს ეს ბრიყვული და უპასუხისმგებლო საუბარი იმაზე, რომ დაალაგეს რუსეთთან ურთიერთობა და წარმატება აქვთ. ეს საუბარი გვაზიანებს ქვეყნის გარეთ და ქვეყნის შიგნითაც“, - განაცხადა გიგა ბოკერიამ.

რუსეთის საგარე უწყების განცხადებაში აქცენტი საქართველოში ნატოს ინფრასტრუქტურის განვითარების საკითხზეა გაკეთებული და აღნიშნულია, რომ ”ასეთი ქმედებები საფრთხეს შეუქმნიდა ამიერკავკასიის რეგიონში ჩამოყალიბების პროცესში მყოფ სტაბილურობას.”

ამასთან, განცხადებაში აღნიშნულია, რომ ნატოს ბოლო სამიტზე მიღებულმა გადაწყვეტილებამ „საგრძნობლად გაზარდა აუცილებლობა, დაიდოს შეთანხმებები ძალის გამოუყენებლობის შესახებ თბილსს, სოხუმსა და ცხინვალს შორის.“

საგარეო უწყება ირწმუნება, რომ ამ მიმართულებით ჟენევის შეხვედრაზე ეფექტურ ნაბიჯად რუსული პროექტი განიხილეს.

ჟენევაში ქართული დელეგაციის ხელმძღვანელი, საგარეო საქმეთა მინისტრის მოადგილე დავით ზალკანიანი კი ირწმუნება, რომ ეს საკითხი ჟენევაში საერთოდ არ ყოფილა განხილული.