ამ დღეებში რუსულ პრესაში გავრცელდა ცნობები იმის თაობაზე, თითქოს საქართველომ და თურქეთმა რუსულ სამხედრო-სატრანსპორტო ავიაციას საჰაერო გზა დაუკეტეს და სომხეთში რუსეთის სამხედრო ბაზა ბლოკირებულია.

თავიდან ეს ცნობა „არგუმენტი ნედელიმ“ გაავრცელა და შემდეგ ბევრმა სხვა გამოცემამ აიტაცა.

თუმცა როგორც ჩანს ეს ან უკრაინის მოვლენების ფონზე პროპაგანდის მიზნით გავრცელებული დეზინფორმაციაა, ან უბრალო უზუსტობა, რადგან ორივე ქვეყანას - საქართველოსა და თურქეთს - საბრძოლო ტვირთებისთვის ეს მარშუტი უკვე დიდი ხანია გადაკეტილი აქვს. რაც შეეხება არასაბრძოლო სამხედრო დანიშნულების ტვირთებს, ექსპერტები აცხადებენ, რომ საქართველოს საჰაერო სივრცე ამ ტვირთებისთვის დაკეტილი არ არის.

რაც შეეხება იმას, რომ საჰაერო კორიდორს, რუსეთი აკრძალული იარაღის გადატანისთვის იყენებს თუ არა და რამდენად კონტროლდება ეს მარშუტი, როგორც ექსპერტი ვახტანგ მაისაია ამბობს, „ეს ცალ-ცალკე საუბრის თემაა“.

თავდაცვის სამინისტროში აცხადებენ, რომ სამხედრო საჰაერო სივრცე ჯერ კიდევ 2008 წლის ომის შემდეგაა დაკეტილი და ამ ინფორმაციაში ახალი არაფერია.

სამხედრო ექსპერტები კი განმარტავენ, რომ ომის შემდეგ საქართველო-რუსეთს შორის დაიდო ახალი ხელშეკრულება, რომლის მიხედვით რუსეთიდან სომხეთის რუსულ სამხედრო ბაზაზე არასაბრძოლო ტვირთის გადატანა ხდებოდა. თუმცა ექსპერტებს უჭირთ იმაზე საუბარი, ბოლო დროს რაიმე ახალი აკრალვა მოხდა თუ არა რუსეთისთვის სამხედრო ავიაციასთან დაკავშირებით.

როგორც სამხედრო ექსპერტი გიორგი თავდგირიძე ამბობს, რუსულ მედიაში საუბარია იმაზე, რომ თურეთისა და საქართველოს მხრიდან საჰაერო კორიდორის ჩაკეტვით სომხეთის გიუმრის ბაზა საბრძოლო ტვირთს ვერ იღებს და ბლოკადაშიაო, საბრძოლო ტვირთის გატარება კი ომის შემდეგ საქართველოს საჰაერო კორიდორით არ ხდება.

„არაფერი ახალი არ ხდება ისეთი, რომ საქართველოსა და თურქეთს ერთობლივად გადაეკეტა საჰაერო სივრცე. ვფიქრობ, რომ რაღაც უზუსტობასთან გვაქვს საქმე ან ძველი პრობლემის თავიდან წამოწევასთან. შესაძლოა თურქეთმა მიიღო საჰაერო კორიდორის ჩაკეტვის გადაწყვეტილება, სირიის საზღვართან გართულებული სიტუაციის გამო და სომხეთში საბრძოლო ტვირთი ვეღარ ჩადის“, - ამბობს „რეზონანსთან“ საუბარში თავდგირიძე.

წყარო: გაზეთი "რეზონანსი"