საქართველოს პარლამენტის თავმჯდომარე, დავით უსუფაშვილი საპარლამენტო დელეგაციასთან ერთად გვიან ღამით იტალიასა და შვეიცარიის კონფედერაციაში ოფიციალური ვიზიტით გაემგზავრა.

საპარლამენტო დელეგაცია მონაწილეობას მიიღებს ვენეციის კომისიის მეასე პლენარულ სესიაში, სადაც დავით უსუფაშვილი კომისიას საქართველოში საკონსტიტუციო რეფორმაზე მუშაობისას მიღწეულ პროგრესს გააცნობს.

ვიზიტის ფარგლებში შეხვერდები ასევე დაგეგმილია ვატიკანში, კარდინალ პიეტრო პაროლინთან და დიპლომატიური მისიების ხელმძღვანელებთან. 11-15 ოქტომბერს კი საქართველოს პარლამენტის თავმჯდომარე შვეიცარიის კონფედერაციას ეწვევა.

საპარლამენტო დელეგაცია, დავით უსუფაშვილის ხელმძღვანელობით, ჟენევაში საპარლამენტთაშორისო კავშირის 131-ე ასამბლეის მუშაობაშიც მიიღებს მონაწილეობას.

კონფერენციის ფარგლებში დავით უსუფაშვილი გერმანიის ბუნდესტაგის პრეზიდენტ, ნორბერტ ლამმერტსაც შეხვდება. პარლამენტის თავმჯდომარე შეხვედრებს ასევე გამართავს რამდენიმე ქვეყნის წარმომადგენელთან.

ქართული დელეგაციის ოფიციალური ვიზიტი 16 ოქტომბერს დასრულდება.