„საქართველოს ექნება მხარდაჭერა ევროკავშირისაგან, ევროინტეგრაციის პროცესში“, - აღნიშნული განცხადება დღეს შტეფან ფულემ გააკეთა. ევროკომისარის თანამდებობაზე ვადის ამოწურვამდე სამი კვირით ადრე ფულე იმ საკითხებზე აკეთებს აქცენტებს, რომელზეც საქართველოს ხელისუფლებამ განსაკუთრებული ყურადღება უნდა გაამახვილოს.

„ძალიან მნიშვნელოვანია, საქართველოს მთავრობამ უფრო დაახლოვოს ქვეყანა ევროკავშირთან. გამოიყენოს შესაძლებლობები, რომლებიც შევთავაზეთ და რომლებზეც წლების განმავლობაში ვმუშაობდით. საქართველოსთან გავაფორმეთ ყველაზე ამბიციური შეთანხმება, რომელიც ბევრს ნიშნავს ქართული ეკონომიკისთვის, საქართველოს მოქალაქეებისთვის, რადგან ეს მხოლოდ სავაჭრო ხელშეკრულება არ არის. ეს არის დოკუმენტი, რომელიც ქმნის მყარ საფუძველს დემოკრატიის, კანონის უზენაესობისა და დამოუკიდებელი სასამართლოს გაძლიერებისათვის. ჩვენ მხარს დავუჭერთ საქართველოს ამ ძალისხმევაში.

ამასთან დაკავშირებით ეჭვიც კი არ არსებობს. ასევე, ყველაფერს გავაკეთებთ, რომ რა ზეწოლაც არ უნდა არსებობდეს სხვა ქვეყნის მხრიდან, ვაჩვენოთ, რომ 21-ე საუკუნეში, ევროპაში ყველა თავისუფალია და თავად ირჩევს მოქმედების კურსს“, - განაცხადა ფულემ.